ایران جنگ پر امریکہ کے 25 ارب ڈالر اخراجات، پینٹاگون کا کانگریس میں انکشاف

واشنگٹن (ش ح ط ) امریکی محکمہ دفاع (پینٹاگون) نے کانگریس کو بتایا ہے کہ ایران کے خلاف جاری جنگ پر اب تک تقریباً 25 ارب ڈالر خرچ کیے جا چکے ہیں، جن میں زیادہ تر رقم اسلحے اور گولہ بارود پر صرف ہوئی ہے۔

یہ انکشاف کانگریس کی آرمڈ سروسز کمیٹی کی سماعت کے دوران سامنے آیا، جہاں ڈیموکریٹک رکن ایڈم سمتھ نے جنگ کے مجموعی اخراجات اور آئندہ مالی تفصیلات طلب کیں۔

سماعت میں پینٹاگون کے اکاؤنٹس کے نگران افسر جُولز ہرسٹ نے تصدیق کی کہ اب تک جنگی اخراجات تقریباً 25 ارب ڈالر تک پہنچ چکے ہیں۔ ان کے مطابق ان اخراجات کا بڑا حصہ فوجی سازوسامان اور گولہ بارود پر خرچ ہوا ہے۔

ایڈم سمتھ نے کہا کہ کانگریس طویل عرصے سے ان اخراجات کی واضح تفصیل مانگ رہی تھی، تاہم پہلی مرتبہ کوئی باضابطہ تخمینہ سامنے آیا ہے۔

اسی اجلاس میں امریکی وزیرِ دفاع پیٹ ہیگستھ نے ایران کی جوہری سرگرمیوں کو “سنگین خطرہ” قرار دیتے ہوئے کہا کہ سابق انتظامیہ کی پالیسیوں کے باعث صورتحال پیچیدہ ہوئی۔ 

انہوں نے دعویٰ کیا کہ ایران نے جوہری عزائم ترک نہیں کیے تھے، اسی لیے امریکہ نے اسرائیل کے ساتھ مل کر کارروائی کا فیصلہ کیا۔

وزیرِ دفاع نے مزید کہا کہ صدر ڈونلڈ ٹرمپ کی جانب سے مجوزہ 1.5 ٹریلین ڈالر دفاعی بجٹ “موجودہ عالمی صورتحال کی سنگینی” کی عکاسی کرتا ہے۔ ان کے مطابق یہ بجٹ امریکی فوج کو جدید خطوط پر استوار کرنے اور “جنگی تیاری” کی مکمل حالت میں لانے کے لیے ضروری ہے۔

جوائنٹ چیفس آف سٹاف کے چیئرمین جنرل ڈین کین نے بھی سماعت میں کہا کہ دنیا میں خطرات تیزی سے بڑھ رہے ہیں، اور امریکی فوج کو جدید ٹیکنالوجی اور دیرپا سرمایہ کاری کی ضرورت ہے۔

انہوں نے کہا کہ مجوزہ دفاعی بجٹ امریکی فوج کو مستقبل کے جنگی چیلنجز سے نمٹنے کے قابل بنانے کے لیے “تاریخی سرمایہ کاری” ہے۔

کانگریس میں قانون سازوں کی جانب سے جنگ کے مقاصد، اخراجات اور آئندہ حکمت عملی پر سوالات کا سلسلہ جاری ہے، جبکہ بعض اراکین نے ایران کے جوہری خطرے اور جنگ کے جواز پر بھی تشویش کا اظہار کیا ہے۔