ایران میں یورینیم کی افزودگی مکمل طور پر بند ہے، وزیر خارجہ عباس عراقچی

تہران (ڈیلی اردو/اے پی/ڈی پی اے/اے ایف پی/روئٹرز) ایرانی وزیر خارجہ کے اس بیان کو تہران کا یہ اشارہ سمجھا جا رہا ہے کہ جوہری پروگرام پر مذاکرات کا دروازہ اب بھی کھلا ہے۔ تاہم عراقچی نے پرامن مقاصد کے لیے یورینیم کی افزدوگی کو ایران کا ناقابلِ تردید حق بھی قرار دیا۔

ایرانی وزیرِ خارجہ عباس عراقچی نے کہا ہے کہ ملک میں کسی بھی مقام پر یورینیم کی افزودگی  نہیں کی جا رہی۔ ایران کے اعلیٰ ترین سفارت کار کے اس تازہ بیان کو مغربی ممالک کے لیے ایک اشارہ سمجھا جا رہا  ہے کہ تہران اپنے جوہری پروگرام پر ممکنہ مذاکرات کے لیے اب بھی دروازہ بند نہیں کر رہا۔

ایران میں موجود امریکی خبر رساں ایجنسی ایسوسی ایٹڈ پریس سے وابستہ ایک صحافی کے سوال کے جواب میں عراقچی نے جون میں اسرائیل اور امریکا کی جانب سے 12 روزہ جنگ کے دوران ایرانی افزودگی مراکز پر بمباری کے بعد ملکی جوہری پروگرام سے متعلق تہران حکومت کا اب تک کا سب سے واضح بیان دیا۔

عراقچی نے کہا، ’’ایران میں کوئی خفیہ جوہری افزودگی نہیں ہو رہی۔ ہماری تمام تنصیبات انٹرنیشنل اٹامک انرجی ایجنسی کی نگرانی اور حفاظتی اقدامات کے تحت ہیں۔ ابھی کوئی افزودگی اس لیے نہیں ہو رہی کیونکہ ہماری  افزودگی کی تنصیبات پر حملہ کیا گیا ہے۔‘‘

امریکا اور دیگر ممالک کے ساتھ مذاکرات جاری رکھنے کے لیے درکار شرائط کے سوال پر عراقچی نے کہا کہ ایران کا اپنے جوہری پروگرام پر پیغام ’’بالکل واضح‘‘ ہے۔

انہوں نے کہا، ’’پرامن جوہری ٹیکنالوجی کے استعمال اورافزودگی کا ایران کا حق ناقابلِ تردید ہے۔ یہ ہمارا حق ہے، ہم اسے جاری رکھیں گے، اور ہم امید کرتے ہیں کہ عالمی برادری، بشمول امریکہ، ہمارے اس ناقابلِ تردید حق کو تسلیم کرے گی۔‘‘

ایرانی حکومت نے اے پی کے رپورٹر کو تین روزہ ویزا جاری کیا تھا تاکہ وہ دیگر برطانوی اور بین الاقوامی صحافیوں کے ساتھ ایک سربراہی اجلاس میں شرکت کر سکیں۔