ایران نے اسرائیل کیلئے حملوں کے الزام میں 6 قیدیوں کو پھانسی دے دی

تہران (ڈیلی اردو/نیوز ایجنسیاں) ایران نے ہفتے کے روز ایسے چھ قیدیوں کو سزائے موت پر عملدرآمد کر دیا، جن پر الزام تھا کہ وہ اسرائیل کی ہدایت پر ملک کے جنوب مغربی علاقوں میں حملوں میں ملوث تھے۔

ایرانی حکام کے مطابق یہ مشتبہ افراد خوزستان صوبے کے شہر خرم شہر کے اطراف میں بم دھماکوں میں ملوث تھے۔ ان حملوں کے نتیجے میں پولیس اور سیکیورٹی اہلکار ہلاک بھی ہوئے تھے۔

واضح رہے کہ یہ علاقہ طویل عرصے سے نسلی اور سیاسی تناؤ کا مرکز رہا ہے۔

جون سن 2025 میں ایران اور اسرائیل کے درمیان مختصر جنگ کے بعد ایرانی سکیورٹی اداروں نے ایسے مشتبہ افراد کے خلاف سخت کارروائیاں شروع کی تھیں، جن پر اسرائیل سے تعلقات کا شبہ تھا۔

ایرانی عدلیہ سے منسلک نیوز ایجنسی میزان کے مطابق پھانسی پانے والے افراد عرب نسل کے علیحدگی پسند تھے۔ خوزستان کی عرب آبادی طویل عرصے سے مرکزی حکومت کی جانب سے امتیازی سلوک کی شکایت کرتی آئی ہے۔ میزان کے مطابق یہ سزائیں ہفتے کی صبح خوزستان صوبے میں عمل میں لائی گئیں۔

انسانی حقوق کی تنظیم ایمنسٹی انٹرنیشنل کے مطابق ایران میں سن 2025 کے دوران اب تک ایک ہزار سے زائد افراد کو پھانسی دی جا چکی ہے۔ یہ تعداد گزشتہ پندرہ برسوں میں سب سے زیادہ بتائی گئی ہیں۔ تنظیم کا کہنا ہے کہ یہ تعداد شاید اس سے بھی زیادہ ہو کیونکہ بہت سی سزاؤں کی اطلاع عام نہیں کی جاتی۔