ایران: ٹارگٹ حملے میں پاسدارانِ انقلاب کے دو اہلکار ہلاک

تہران (ڈیلی اردو) ایران کے صوبہ کرمانشاہ میں ٹارگٹ حملے میں پاسدارانِ انقلاب (آئی آر جی سی) کے دو اہلکار ہلاک جبکہ دو دیگر شدید زخمی ہو گئے ہیں۔

ایرانی حکام کے مطابق یہ حملہ پاوہ شہر میں پیش آیا۔ پاسدارانِ انقلاب کے شعبۂ تعلقاتِ عامہ نے واقعے کو دہشت گرد حملہ قرار دیتے ہوئے کہا ہے کہ متعلقہ ادارے تحقیقات کر رہے ہیں۔

ہلاک ہونے والے اہلکاروں کی شناخت خالد خالدینیا اور برہان کرسانی کے ناموں سے ہوئی ہے۔

دوسری جانب کرد انسانی حقوق تنظیم ہینگاو کا کہنا ہے کہ "خوری ہیوا" (Xorî Hîwa، بمعنی "امید کا سورج") نامی ایک کرد باغی گروہ نے حملے کی ذمہ داری قبول کی ہے۔

اپوزیشن ذرائع کے مطابق گروہ نے دعویٰ کیا ہے کہ حملے میں حکومت سے وابستہ ایسے مقامی افراد کو نشانہ بنایا گیا جن پر حکومتی اداروں کے لیے مخبری اور تعاون کا الزام تھا۔ تنظیم نے یہ بھی الزام عائد کیا کہ ہلاک ہونے والا اہلکار خالد خالدینیا 2022–2023 کے "خاتون، زندگی، آزادی" احتجاجی مظاہروں کے دوران جوانرود میں کریک ڈاؤن میں ملوث تھا۔