ایران پُرامن ایٹمی ٹیکنالوجی کے حق سے دستبردار نہیں ہوگا، عباس عراقچی

تہران (ڈیلی اردو ) ایران کے وزیر خارجہ عباس عراقچی نے کہا ہے کہ ایران کسی بھی صورت پُرامن ایٹمی ٹیکنالوجی کے حق سے دستبردار نہیں ہوگا، تاہم اگر سفارت کاری کو ترجیح دی جائے تو امریکہ کے ساتھ معاہدہ جلد ممکن ہے۔

امریکہ اور ایران کے درمیان مذاکرات کا تیسرا دور جمعرات کو جنیوا میں شروع ہوگا۔ عمان کی ثالثی میں ہونے والے ان مذاکرات میں ایرانی وفد کی قیادت عباس عراقچی کر رہے ہیں۔

عباس عراقچی نے سماجی رابطے کی ویب سائٹ پر اپنے بیان میں کہا کہ مذاکرات کے پہلے دو ادوار کی پیش رفت کی بنیاد پر ایران ایک منصفانہ اور متوازن معاہدے کے حصول کے لیے بات چیت دوبارہ شروع کرے گا۔ انہوں نے کہا کہ ایران کبھی ایٹمی ہتھیار تیار نہیں کرے گا، لیکن ایرانی قوم کے لیے پُرامن ایٹمی ٹیکنالوجی کے ثمرات حاصل کرنے کے حق سے بھی دستبردار نہیں ہوگا۔

ان کا کہنا تھا کہ ایک تاریخی موقع موجود ہے کہ ایسا معاہدہ کیا جائے جو باہمی خدشات دور کرے اور مشترکہ مفادات کو یقینی بنائے۔ انہوں نے مزید کہا کہ ایران نے اپنی خودمختاری کے تحفظ کے لیے ہمیشہ ثابت قدمی دکھائی ہے اور مذاکرات کی میز پر بھی ہر اختلاف کا پُرامن حل تلاش کرے گا۔

مجید تخت روانچی

دوسری جانب ایران کے نائب وزیر خارجہ مجید تخت روانچی نے کہا ہے کہ تہران امریکہ کے ساتھ جلد از جلد کسی معاہدے پر پہنچنے کے لیے پُرعزم ہے اور اس مقصد کے لیے ضروری اقدامات کرنے کو تیار ہے۔

ممکنہ امریکی حملے سے متعلق سوال کے جواب میں انہوں نے کہا کہ ایسا اقدام ایک بڑا جوا ہوگا، تاہم اگر ایران کے خلاف جارحیت کی گئی تو اس کا جواب دیا جائے گا۔

امریکی صدر ڈونلڈ ٹرمپ پہلے ہی کہہ چکے ہیں کہ سفارت کاری کی ناکامی کی صورت میں ایران کے خلاف طاقت کے استعمال کا امکان رد نہیں کیا جا سکتا۔