باجوڑ میں ڈرون حملہ، سکول سے گھر لوٹتے 2 بچے ہلاک

خار (ڈیلی اردو/ٹی این این) پاکستان کے شورش زدہ صوبہ خیبر پختونخوا کے قبائلی ضلع باجوڑ کی تحصیل ماموند کے علاقے شاہی تنگی میں مبینہ ڈرون حملے کے نتیجے میں سکول سے واپس آنے والے دو بچے ہلاک ہو گئے۔

ہلاک ہونے والوں کی شناخت حسن ولد اسرار (عمر 10 سال) اور معلوم ولد مولانا ممتاز (عمر 12 سال) کے ناموں سے ہوئی ہے۔

مقامی ذرائع کے مطابق دونوں بچے سکول سے گھر واپس جا رہے تھے کہ اسی دوران مبینہ طور پر ڈرون سے گرایا گیا دھماکہ خیز مواد ان پر آ گرا، جس کے نتیجے میں دونوں موقع پر ہی ہلاک ہو گئے۔

ڈی ایس پی پولیس نیاز نے واقعے کی تصدیق کرتے ہوئے بتایا کہ دونوں بچوں کی لاشیں ڈسٹرکٹ ہیڈکوارٹر ہسپتال خار منتقل کر دی گئی ہیں۔

واضح رہے کہ گزشتہ روز بھی اسی علاقے میں ایک مسجد پر نامعلوم سمت سے ڈرون کے ذریعے بم گرایا گیا تھا، تاہم اس واقعے میں کوئی جانی نقصان نہیں ہوا تھا۔ آج پیش آنے والے واقعے کے بعد علاقے میں شدید تشویش اور بے چینی پائی جا رہی ہے۔