بغداد: داعش کے مطلوب شخص کے گھر سے پولیس افسر کے قاتل سمیت دو افراد گرفتار

بغداد(ڈیلی اردو) عراق کے دارالحکومت بغداد میں سکیورٹی فورسز نے انٹیلی جنس کارروائی کے دوران ایک پولیس افسر کے قتل میں ملوث مرکزی ملزم کو گرفتار کرلیا۔ حکام کے مطابق ملزم ایک ایسے شخص کے گھر میں چھپا ہوا تھا جو اسے پناہ دے رہا تھا، تاہم کارروائی کے دوران مکان کے مالک کو بھی گرفتار کرلیا گیا۔

عراقی وزارت داخلہ کے محکمہ تعلقات و میڈیا کے سربراہ میجر جنرل مقداد میری کے مطابق الرصافہ کے علاقے میں ’’الصقور‘‘ انٹیلی جنس سیل نے فنی اور خفیہ معلومات کی بنیاد پر کارروائی کرتے ہوئے بریگیڈیئر ہشام محمد کے قاتل کا سراغ لگایا اور اسے گرفتار کرلیا۔

وزارت داخلہ کے مطابق ملزم کو جس شخص کے گھر سے گرفتار کیا گیا، تفتیش کے دوران معلوم ہوا کہ وہ بھی داعش سے وابستگی کے الزام میں انسداد دہشتگردی قانون کی دفعہ 4 کے تحت نینویٰ کی انٹیلی جنس و انسداد دہشتگردی ڈائریکٹوریٹ کو مطلوب تھا۔ دونوں گرفتار افراد کو قانونی کارروائی کے بعد متعلقہ اداروں کے حوالے کردیا گیا۔

حکام کے مطابق یہ گرفتاری بغداد کے جنوبی علاقے الدورا میں پیش آنے والے فائرنگ کے واقعے کے بعد عمل میں آئی، جس میں سکیورٹی و بلدیاتی اہلکار تجاوزات کے خلاف کارروائی میں مصروف تھے۔ فائرنگ کے نتیجے میں بریگیڈیئر ہشام محمد طلاع اور سکیورٹی اہلکار خالد عباس لفتہ ہلاک جبکہ چار افراد زخمی ہوئے تھے۔

عراقی سکیورٹی حکام نے کہا ہے کہ مطلوب افراد کی گرفتاری اور انہیں پناہ دینے والوں کے خلاف کارروائی کا سلسلہ جاری رہے گا۔