بلوچستان سے دہشت گردی کو جڑ سے ختم کرینگے، صدر زرداری

اسلام آباد(ڈیلی اردو) پاکستان کے صدر مملکت آصف علی زرداری سے وزیراعلیٰ بلوچستان میر سرفراز بگٹی نے ایوانِ صدر میں ملاقات کی، جس کے دوران بلوچستان کی مجموعی صورتحال، امن و امان اور صوبے میں جاری ترقیاتی سرگرمیوں کا جائزہ لیا گیا۔

وزیراعلیٰ بلوچستان نے صدر مملکت کو صوبے میں جاری ترقیاتی منصوبوں اور عوامی فلاح و بہبود کے لیے کیے جانے والے اقدامات سے متعلق آگاہ کیا۔

اس موقع پر صدر آصف علی زرداری نے کہا کہ بلوچستان میں پائیدار امن، ترقی اور عوامی خوشحالی کے لیے وفاقی اور صوبائی حکومتوں کے درمیان مؤثر رابطہ اور تعاون ضروری ہے۔ انہوں نے کہا کہ رقبے کے اعتبار سے ملک کے سب سے بڑے صوبے بلوچستان کی ترقی کے لیے اسے مطلوبہ وسائل اور خصوصی توجہ فراہم کی جانی چاہیے۔

صدر مملکت نے کہا کہ بیرونی حمایت حاصل کرنے والے دہشت گرد عناصر بلوچستان میں ترقی اور خوشحالی کے عمل کو متاثر کرنے کی کوشش کر رہے ہیں، تاہم ان کے عزائم کو ہر صورت ناکام بنایا جائے گا۔

آصف علی زرداری نے اس عزم کا اظہار کیا کہ بلوچستان سے دہشت گردی کے مکمل خاتمے کا وقت دور نہیں۔ انہوں نے کہا کہ صوبے میں امن و استحکام برقرار رکھنے اور ترقیاتی عمل کو آگے بڑھانے کے لیے کوششیں جاری رکھی جائیں گی۔