بلوچستان: چمن میں دستی بم حملہ، ایک مزدور ہلاک، لسبیلہ میں پنجاب کے شہری کی لاش برآمد

کوئٹہ (ڈیلی اردو) پاکستان کے شورش زدہ صوبہ بلوچستان کے ضلع چمن میں نامعلوم مسلح دہشت گردوں کے دستی بم حملے میں سندھ سے تعلق رکھنے والا ایک مزدور ہلاک جبکہ تین زخمی ہوگئے۔

پولیس کے مطابق واقعہ پرانے چمن کے علاقے میں پیش آیا، جہاں شاہراہ کی تعمیر پر کام کرنے والے مزدور سو رہے تھے کہ حملہ آوروں نے ان پر دستی بم پھینک دیا۔ ڈی ایس پی اشفاق مغل کے مطابق دونوں مزدوروں کا تعلق سندھ سے ہے۔ 

حکام کا کہنا ہے کہ چمن کے پشتون اکثریتی علاقے میں مزدوروں پر یہ اپنی نوعیت کا پہلا حملہ ہے، جبکہ تاحال کسی گروپ نے ذمہ داری قبول نہیں کی۔

دوسری جانب ضلع لسبیلہ میں پنجاب کے ضلع لودھراں سے تعلق رکھنے والے احمد شاہ کی لاش برآمد ہوئی ہے۔ پولیس کے مطابق وہ چند ماہ قبل روزگار کی غرض سے لسبیلہ آئے تھے اور قلفی فروخت کرتے تھے۔ 31 جولائی کو لاپتا ہونے کے بعد ان کے اغوا کا مقدمہ درج کیا گیا تھا، جبکہ بعد میں ان کی لاش ملی۔

پولیس نے دونوں واقعات کے مقدمات درج کرکے تحقیقات شروع کر دی ہیں، جبکہ لسبیلہ واقعے کی مزید تفتیش محکمہ انسداد دہشت گردی (سی ٹی ڈی) کر رہا ہے۔