بلوچستان: کوئٹہ میں خاتون خودکش بمبار داخل، تھریٹ الرٹ جاری

کوئٹہ (ڈیلی اردو) صوبہ بلوچستان کے صوبائی دارالحکومت کوئٹہ میں دہشتگردی کی لہر ایک بار پھر سر اٹھانے لگی۔ سینٹرل پولیس آفس کوئٹہ کی جانب سے خاتون خودکش حملہ آور سے متعلق تھریٹ الرٹ جاری کردیا گیا۔

سینٹرل پولیس آفس کوئٹہ کی جانب سے ممکنہ دہشتگردی کے پیش نظر شہر کے تمام ایس پیز کو بھیجے جانے والے مراسلے میں ہائی الرٹ رہنے کی ہدایت کی گئی ہے۔

https://twitter.com/Natsecjeff/status/1598942266273693696?t=k1BhYEpzoy5Y_qc6Au0ZhQ&s=19

مراسلے کے مطابق کالعدم تنظیم داعش خراسان شہر میں دہشتگردی کی منصوبہ بندی کررہی ہے۔

متن کے مطابق کالعدم تنظیم نے تخریب کاری کیلئے خودکش خاتون بمبار کو تیار کیا ہے تاہم فی الحال یہ معلومات دستیاب نہیں ہیں کہ شہر میں کس جگہ کو ٹارگٹ کیا جائے گا۔

مراسلے میں خودکش بمبار کی تفصیلات بھی فراہم کی گئی ہیں جس کے مطابق زینت زوجہ ضیاء الرحمان کو خودکش حملے کیلئے تیار کیا گیا ہے۔

چند روز قبل کوئٹہ میں بلیلی کے علاقے میں کیے جانے والے خود کش حملے میں پولیو ٹیموں کی سیکورٹی پر مامور ٹرک کو نشانہ بنایا گیا تھا۔

حادثے میں 2 پولیس اہلکاروں کے علاوہ خاتون اور 2 بچوں سمیت 6 افراد جان سے گئے۔

رواں سال جامعہ کراچی میں چینی اساتذہ کی گاڑی کو نشانہ بنانے والی خاتون خودکش حملہ آور شاری بلوچ کا تعلق بھی بلوچستان سے تھا۔