بنوں: سی ٹی ڈی کی بکا خیل میں کارروائی، تحریک طالبان پاکستان کے 4 دہشت گرد گرفتار

پشاور (بیورو رپورٹ) کاونٹر ٹیررازم ڈیپارٹمنٹ (سی ٹی ڈی) نے بنوں ریجن میں کارروائی کرتے ہوئے بم دھماکوں میں مطلوب کالعدم تنظیم تحریک طالبان پاکستان کے چار دہشت گردوں کو گرفتار کرلیا۔

گرفتار دہشت گردوں کا تعلق تحریک طالبان پاکستان کے کمانڈر خافظ گل بہادر گروپ سے ہے۔

سی ٹی ڈی حکام کا کہنا ہے کہ بنوں ریجن کے علاقے بکا خیل میں کارروائی کے دوران گرفتار ہونے والے دہشت گردوں کی شناخت یوسف ولد مامور خان، خان ستار ولد خانباز، عابد اللہ ولد سہیل خان اور ظراق ولد حیران کے ناموں سے ہوئی ہے۔

سی ٹی ڈی ترجمان کا کہنا تھا کہ چاروں دہشت گرد سرکاری املاک کو نقصان پہنچانے کی منصوبہ بندی کررہے تھے۔

گرفتار دہشت گردوں کے قبضے سے بھاری مقدار میں اسلحہ اور دیگر مواد برآمد کرلیا گیا ہے۔ سی ٹی ڈی ترجمان کے مطابق دہشتگردوں کو تفتیش کے لئے نامعلوم منتقل کردیا گیا ہے۔