بنوں میں سیکیورٹی فورسز کی کارروائیاں، 10 دہشتگرد ہلاک، متعدد ٹھکانے تباہ

بنوں(ڈیلی اردو) خیبر پختونخوا کے ضلع بنوں میں سیکیورٹی فورسز نے خفیہ اطلاعات کی بنیاد پر مختلف علاقوں میں متعدد کارروائیاں کرتے ہوئے 10 دہشتگردوں کو ہلاک اور 16 کو زخمی کردیا۔

سیکیورٹی ذرائع کے مطابق دہشتگردوں کی نقل و حرکت اور مشتبہ ٹھکانوں کی نگرانی کے بعد مختلف مقامات پر کارروائیاں کی گئیں، جن میں کواڈ کاپٹرز کی مدد بھی حاصل کی گئی۔

ذرائع کا کہنا ہے کہ ایک مدرسے کو مبینہ طور پر دہشتگردوں نے پناہ گاہ کے طور پر استعمال کر رکھا تھا۔ شہریوں کے تحفظ کے پیش نظر کارروائی سے قبل مدرسے کو خالی کرایا گیا، جس کے بعد وہاں سے ہونے والی فائرنگ کا جواب دیتے ہوئے دہشتگردوں کو نشانہ بنایا گیا۔

کارروائیوں کے دوران درختوں کے نیچے چھپے دہشتگردوں اور موٹر سائیکلوں پر نقل و حرکت کرنے والے مسلح افراد کو بھی نشانہ بنایا گیا۔

سیکیورٹی ذرائع کے مطابق کارروائیوں میں متعدد خفیہ ٹھکانے تباہ کرنے کے علاوہ بڑی مقدار میں اسلحہ اور گولہ بارود بھی برآمد کیا گیا ہے۔ علاقے میں سرچ اور کلیئرنس آپریشن جاری ہے۔