بنوں میں 4 ڈرون حملے، پولیس و سیکیورٹی فورسز کی کارروائی میں 5 دہشتگرد ہلاک، متعدد زخمی

بنوں(ڈیلی اردو) خیبرپختونخواہ کے شورش زدہ ضلع بنوں کے مختلف علاقوں میں دہشتگردوں کی جانب سے ڈرون حملوں اور سیکیورٹی فورسز کی کارروائی کے واقعات پیش آئے، جن میں پولیس و سیکیورٹی فورسز کی مشترکہ کارروائی کے دوران 5 دہشتگرد ہلاک اور متعدد زخمی ہوگئے، جبکہ ڈرون حملوں میں کوئی جانی نقصان نہیں ہوا۔

ڈرون حملے

 پولیس کے مطابق نامعلوم دہشتگردوں نے بنوں میں نالہ کاشو پولیس چیک پوسٹ، تھانہ احمد زئی اور دو دیگر مقامات کو کواڈکاپٹر ڈرونز کے ذریعے نشانہ بنانے کی کوشش کی۔ کاشو پل پولیس چوکی پر حملے کے دوران بارودی مواد کے گولے چوکی کے باہر گرے، تاہم اہلکار محفوظ رہے اور کسی قسم کا جانی نقصان نہیں ہوا۔ پولیس کی بروقت جوابی کارروائی کے بعد حملہ آور ڈرون واپس چلا گیا۔ واقعے کی مزید تحقیقات جاری ہیں۔

پولیس و سیکیورٹی فورسز کی کارروائی

دوسری جانب ڈومیل کے علاقوں سدرون، اکبر علی خان کلا اور ملحقہ علاقوں میں دہشتگردوں کی موجودگی کی اطلاع پر ڈسٹرکٹ پولیس آفیسر بنوں کیپٹن (ر) محمد فرقان بلال کی قیادت میں پولیس اور سیکیورٹی فورسز نے مشترکہ انٹیلیجنس بیسڈ آپریشن کیا۔ فورسز نے علاقے کا محاصرہ کرکے دہشتگردوں کے خلاف کارروائی کی، جس کے نتیجے میں ابتدائی اطلاعات کے مطابق 5 دہشتگرد ہلاک جبکہ متعدد زخمی ہوگئے۔

ذرائع کے مطابق زخمی دہشتگردوں کو ان کے ساتھی دشوار گزار اور جھاڑیوں والے علاقوں کی جانب منتقل کرکے فرار ہوگئے۔ کارروائی کے بعد علاقے میں دہشتگردوں کے ممکنہ ٹھکانوں اور مشتبہ نقل و حرکت کی تلاش کے لیے سرچ اینڈ کلیئرنس آپریشن جاری ہے۔

پولیس کے مطابق کارروائی مکمل ہونے کے بعد مزید تفصیلات سامنے آنے کا امکان ہے، جبکہ دہشتگردی کے خلاف پولیس اور سیکیورٹی فورسز کی مشترکہ کارروائیاں جاری ہیں۔