بنوں : سیکیورٹی فورسز کی کارروائی، 2 دہشتگرد ہلاک، اسلحہ برآمد

بنوں(ڈیلی اردو) خیبرپختونخوا کے شورش زدہ ضلع بنوں میں سیکیورٹی فورسز نے دہشتگردوں کی موجودگی کی اطلاع پر کارروائی کرتے ہوئے دو دہشتگردوں کو ہلاک کردیا۔

ذرائع کے مطابق سیکیورٹی فورسز نے خفیہ اطلاعات کی بنیاد پر علاقے میں کارروائی کی، اس دوران دہشتگردوں اور اہلکاروں کے درمیان فائرنگ کا تبادلہ ہوا، جس کے نتیجے میں دو دہشتگرد مارے گئے۔

کارروائی کے بعد علاقے کی تلاشی کے دوران ہلاک دہشتگردوں کے قبضے سے بھاری مقدار میں اسلحہ، گولہ بارود اور دیگر سامان برآمد کیے جانے کی اطلاعات ہیں۔

سیکیورٹی ذرائع کے مطابق برآمد ہونے والا اسلحہ اور گولہ بارود دہشتگردوں کی جانب سے مزید تخریبی کارروائیوں کی تیاری میں استعمال کیا جانا تھا۔

کارروائی کے بعد سیکیورٹی فورسز نے علاقے میں سرچ آپریشن کا دائرہ بڑھاتے ہوئے ممکنہ سہولت کاروں اور دہشتگرد نیٹ ورک سے وابستہ افراد کی تلاش شروع کردی ہے۔ بنوں اور ملحقہ علاقوں میں امن و امان برقرار رکھنے اور دہشتگرد عناصر کی نقل و حرکت روکنے کے لیے سیکیورٹی اقدامات مزید سخت کیے جا رہے ہیں۔