ترکی کا مقبوضہ کشمیر پر اسمبلی میں قرارد داد منظور کرانے کا اعلان

استنبول + اسلام آباد (مانیٹرنگ ڈیسک) ترک اسپیکر مصطفی سنتپ نے اپنی اسمبلی سے کشمیر کے معاملے پر قرارداد منظور کرانے کی یقین دہانی کرائی ہے۔

اسپیکر قومی اسمبلی اسد قیصر نے ترکی کے اسپیکر مصطفیٰ سنتپ سے ٹیلی فون پر رابطہ کیا اور خطے کی مجموعی اور مقبوضہ کشمیر کی بالخصوص بگڑتی صورتحال پر ترک اسپیکر کو اعتماد میں لیا اور دونوں اسپیکروں نے کشمیر کے حوالے سے مشترکہ لائحہ عمل بنانے پر اتفاق کیا۔

Called Speaker Grand NA of Turkey @MustafaSentop . He assured his all out support for the right of self-determination of People of IOK. Turkish Speaker pledged to raise the situation of Kashmir in the Grand NA of Turkey to pass a joint resolution.#PakistanStandsWithKashmir pic.twitter.com/sLMnRG9lsW

— Asad Qaiser (@AsadQaiserPTI) August 9, 2019

اسپیکر قومی اسمبلی اسد قیصر کا کہنا تھا کہ کشمیر پر بھارتی جارحیت کھل کر سامنے آ گئی ہے۔

بھارتی آئین میں کشمیر کی خصوصی حیثیت ختم کر کے مودی سرکار نے کشمیر کو اپنی نوآبادی بنانے کے مذموم منصوبے پر عمل کیا ہے اور یہ نسل کشی اور مذہبی بنیادوں پر آبادیوں کو تاراج کرنے کی بدترین مثال ہے۔

اسد قیصر نے کہا کہ ترک صدر طیب اردگان نے جس جرات سے کشمیر میں بھارتی اقدامات کی مذمت کی ہے ساری پاکستانی قوم ان کی شکرگزار ہے۔

پاکستان کی قومی اسمبلی اس تاریخی بھارتی بددیانتی کو تمام بین الاقوامی پارلیمانی اداروں میں اٹھانا چاہتی ہے اور ترکی میں ہونے والی آئندہ پانچ ملکی اسپیکرز کانفرنس کے ایجنڈے میں کشمیر کی موجودہ صورتحال شامل کرنے کا مطالبہ کرتی ہے۔

ترک اسپیکر مصطفیٰ سنتپ نے کشمیری عوام پر بھارتی مظالم پر گہری تشویش کا اظہار کرتے ہوئے کہا کہ بھارت نے کشمیر پر شب خون مارا اور کشمیری عوام کو یرغمال بنا رکھا ہے، مشکل کی اس گھڑی میں کشمیری اور پاکستانی بھائی بہنوں کے شانہ بشانہ کھڑے ہیں۔

انہوں نے مزید کہا کہ ہم او آئی سی کے اس بیان کا خیرمقدم کرتے ہیں جو پاکستانی موقف کی تائید کرتا ہے اور ترکی بھی پاکستان کے اصولی موقف کی بھرپور تائید کرتا ہے۔

ترک اسپیکر نے اسد قیصر کو یقین دہانی کرواتے ہوئے ترکی کی اسمبلی سے کشمیر کے معاملے پر قرارداد منظور کرانے اعلان کیا اور کہا کہ ترک پارلیمان کی اس معاملے پر گہری نظر ہے۔ کشمیر کی خصوصی حیثیت کو ختم کرنے کے بھارتی اقدامات کی کوئی قانونی اور اخلاقی حیثیت نہیں۔