توہین مذہب کا کیس: سابق وزیر داخلہ شیخ رشید کی عبوری ضمانت منظور

راولپنڈی (ڈیلی اردو) لاہور ہائیکورٹ راولپنڈی بینچ نے توہین مذہب کے کیس میں سابق وزیر داخلہ شیخ رشید کی عبوری ضمانت منظور کرلی، عدالت نے ایک لاکھ روپے کے مچلکوں کے عوض ضمانت دی۔

جمعے کے روز عوامی مسلم لیگ کے سربراہ اور سابق وزیر داخلہ شیخ رشید لاہور ہائیکورٹ راولپنڈی بینچ پہنچے اور توہین مذہب کیخلاف مقدمے میں عبوری ضمانت کی درخواست دائر کی، درخواست ضمانت پر سماعت جسٹس ملک شہزاد احمد خان نے کی۔

عدالت نے توہین مذہب مقدمات میں شیخ رشید کی عبوری ضمانت منظور کرتے ہوئے انتظامیہ کو 18 مئی تک گرفتاری سے روک دیا۔

عدالت نے شیخ رشید کی ایک لاکھ روپے کے مچلکوں کے عوض عبوری ضمانت منظور کرلی اور مقدمات کے اخراج کیلئے فریقین کو بھی نوٹس جاری کردیئے۔

سابق وزیر داخلہ شیخ رشید کیخلاف مسجد نبوی واقعے پر فیصل آباد، گوجرخان، راولپنڈی اور اٹک سمیت نوشہروں میں مقدمات درج ہیں جبکہ انہیں مقدمات میں شیخ رشید کے بھتیجے شیخ راشد شفیق پہلے ہی گرفتار ہیں۔