تین ماہ بعد ایران نے علی خامنہ ای کی تدفین کا اعلان کر دیا

تہران (ڈیلی اردو) ایران نے منگل کے روز اعلان کیا ہے کہ مرحوم سپریم لیڈر آیت اللہ علی خامنہ ای کی یاد میں تین روزہ سرکاری جنازہ اور تدفین کے پروگرام منعقد کیے جائیں گے۔ ان تقریبات کی تاریخ کا اعلان بعد میں کیا جائے گا۔

علی خامنہ ای، جنہوں نے تقریباً 37 برس تک ایران کی اسلامی جمہوریہ کی قیادت کی، 28 فروری کو تہران میں اپنے گھر پر ہونے والے امریکی اور اسرائیلی حملوں میں ہلاک ہو گئے تھے۔

ابتدائی طور پر ان کی سرکاری تدفین 4 مارچ کو ہونا تھی، تاہم جنگی حالات کے باعث اسے مؤخر کر دیا گیا تھا۔

تہران کے نائب میئر محمد امین توکل زادہ نے سرکاری ٹی وی کے ساتھ گفتگو کرتے ہوئے کہا، ’’تدفین سے قبل تین روزہ عوامی تقریبات کا منصوبہ بنایا گیا ہے۔‘‘

انہوں نے بتایا کہ تدفین کے پروگرام ممکنہ طور پر محرم کے اسلامی مہینے کے آغاز میں منعقد کیے جائیں گے، جو جون کے وسط میں شروع ہو گا۔

توکل زادہ کے مطابق مرکزی تعزیتی تقریبات تین شہروں تہران، قم اور مشہد میں منعقد ہوں گی۔

انہوں نے کہا کہ علی خامنہ ای کو مشہد میں سپرد خاک کیا جائے گا۔

حکام کے مطابق صرف تہران میں ہونے والی مرکزی تقریب کم از کم 24 گھنٹے جاری رہے گی، جس میں تقریباً 20 ملین افراد کی شرکت متوقع ہے۔

ایرانی حکام کا کہنا ہے کہ یہ تقریبات ملک کی حالیہ تاریخ کے سب سے بڑے عوامی اجتماعات ثابت ہوں گی۔