جنوبی وزیرستان: لدھا سے تحصیلدار اغوا، تلاش جاری

اسلام آباد (شبیر حسین طوری) خیبر پختونخوا کے قبائلی ضلع جنوبی وزیرستان کے تحصیلدار کو لدھا سے نامعلوم نقاب پوشوں نے اغوا کر لیا ہے۔ ان کے بارے میں اب تک کوئی خبر نہیں ملی ہے۔
 
تفصیلات کے مطابق جنوبی وزیرستان کی تحصیل لدھا کے تحصیلدار کو نامعلوم افراد نے اغوا کرلیا۔ ذرائع کے مطابق تحصیلدار گل دراز منگل کے روز ڈیوٹی سے واپسی کے بعد دوست کے ہاں کھانے کیلئے رکے تھے اور رات کو واپسی پر نامعلوم افراد نے راستے میں اغوا کرلیا۔

ذرائع کے مطابق نامعلوم افراد نے تحصیلدار کے ساتھ ڈیوٹی پر مامور لیویز اہلکار سے اسلحہ بھی چھین لیا۔ شبہ ہے کہ تحصیلدار کو طالبان نے اغوا کر لیا ہے

دوسری جانب مقامی انتظامیہ نے تحصیلدار کے اغوا کے حوالے سے تفتیش شروع کردی ہے۔

سیکیورٹی ذرائع کے مطابق مقامی انتظامیہ تحصیلدار کے اغوا کے بعد سکیورٹی فورسز نے جنوبی وزیرستان اور نیم قبائلی علاقوں میں تمام چیک پوسٹوں کی ناکہ بندی کر دی ہے اور آنے جانے والوں کی سخت تلاشی لی جا رہی ہے لیکن تاحال کسی قسم کی گرفتاری عمل میں نہیں آئی ہے۔