جوہری مذاکرات: ایران اور امریکہ معاہدے کے قریب پہنچ گئے، رفال گروسی

ویانا (ڈیلی اردو رپورٹ) اقوامِ متحدہ کے جوہری نگران ادارے کے سربراہ رفال گروسی نے کہا ہے کہ ایران اور امریکہ جوہری فریم ورک پر اتفاق کے قریب پہنچ چکے ہیں، جس سے دونوں فریقوں کو باقی مسائل حل کرنے کے لیے مزید وقت مل سکتا ہے۔

بین الاقوامی ایٹمی توانائی ایجنسی (آئی اے ای اے) کے ڈائریکٹر جنرل رفال گروسی نے ویانا میں بورڈ آف گورنرز کے ہنگامی اجلاس کے بعد صحافیوں سے گفتگو کرتے ہوئے کہا کہ ادارہ ایران اور امریکہ دونوں کے ساتھ رابطے میں ہے، تاہم وہ براہِ راست مذاکرات کا حصہ نہیں۔

رفال گروسی کے مطابق، ’’ہماری رائے میں دونوں فریق اس بات کے قریب ہیں کہ ایک ایسے فریم ورک پر اتفاق ہو جائے جو انھیں مختلف مسائل کا جائزہ لینے کے لیے وقت فراہم کرے۔‘‘

یہ ہنگامی اجلاس مصر، اردن، مراکش اور سعودی عرب کی درخواست پر طلب کیا گیا تھا، جس کی وجہ گزشتہ ماہ متحدہ عرب امارات کے براکہ نیوکلیئر پاور پلانٹ پر ایرانی حملہ تھا۔ رفال گروسی نے اس حملے کو ’’ناقابلِ قبول‘‘ قرار دیا۔

دوسری جانب ویانا میں ایران، چین اور روس کے مستقل نمائندوں نے آئی اے ای اے کے سربراہ رفال گروسی کے ساتھ مشترکہ ملاقات بھی کی، جس میں آئندہ ہفتے ہونے والے بورڈ آف گورنرز اجلاس کے ایجنڈے پر تبادلہ خیال کیا گیا۔

ایران کے مستقل مشن نے سوشل میڈیا پلیٹ فارم ایکس پر ملاقات کی ویڈیو جاری کرتے ہوئے کہا کہ فریقین نے آنے والے اجلاس سے متعلق مختلف امور پر گفتگو کی۔

اس ملاقات سے چند گھنٹے قبل آئی اے ای اے نے ایران کے جوہری پروگرام سے متعلق اپنی نئی رپورٹ بورڈ آف گورنرز کے ارکان کو پیش کی۔

رپورٹ میں ایک بار پھر خبردار کیا گیا کہ ایران کی افزودہ یورینیم کے ذخائر کی تصدیق کے لیے تنصیبات تک مکمل رسائی نہ ہونا ’’پھیلاؤ کے خدشات‘‘ کو بڑھا رہا ہے۔

رپورٹ میں ایران پر زور دیا گیا کہ وہ ایجنسی کے ساتھ تعمیری انداز میں تعاون اور روابط کو فروغ دے۔

آئندہ ہفتے ہونے والا بورڈ آف گورنرز کا اجلاس حالیہ امریکی اور اسرائیلی حملوں اور چالیس روزہ جنگ کے بعد پہلا اہم اجلاس تصور کیا جا رہا ہے۔