جی ایچ کیو پر حملہ: عدالت نے پی ٹی آئی کے 8 کارکنان کو ملٹری کورٹس کے حوالے کرنے کی منظوری دیدی

راولپنڈی (ڈیلی اردو) راولپنڈی کی انسداد دہشت گردی کی عدالت نے 9 مئی کو جلاؤ گھیراؤ اور جنرل ہیڈ کوارٹرز (جی ایچ کیو) پر حملے میں نامزد پاکستان تحریک انصاف کے 8 کارکنان کو ملٹری کورٹس کے حوالے کرنے کی منظوری دے دی۔

انسداد دہشت گردی کی عدالت میں 8 نامزد ملزمان کو ملٹری کورٹس کے حوالے کرنے کی درخواست پر سماعت ہوئی۔

درخواست ڈپٹی پراسیکیوٹر جنرل ملک رفاقت علی کی جانب سے دائر کی گئی۔ سماعت کے بعد عدالت نے نامزد 8 ملزمان کو ملٹری کورٹس کے حوالے کرنے کی استدعا منظور کرلی۔

ملزمان علی حسن، لال شاہ، شہریار ذوالفقار، فرہاد خان پر تھانہ سول لائن میں مقدمہ درج ہے جبکہ ادریس، عمر فاروق، راجہ احسان اور عبداللہ کے خلاف تھانہ آرے بازار میں مقدمہ درج ہے۔

آٹھوں ملزمان اڈیالہ جیل راولپنڈی میں قید ہیں۔

خیال رہے کہ اس سے قبل جناح ہاؤس لاہور، مردان اور پشاور میں فوجی تنصیبات پر حملے کرنے والے پاکستان تحریک انصاف کے کارکنان کو بھی آرمی ایکٹ کے تحت ٹرائل کیلئے ملٹری کورٹس کے حوالے کیا جا چکا ہے۔