حکومت لیگل ٹیم کیساتھ پرویز مشرف غداری کیس کے فیصلے کو دیکھے گی: فردوس عاشق اعوان

اسلام آباد (ڈیلی اردو) وزیر اعظم کی معاون خصوصی برائے اطلاعات فردوس عاشق اعوان نے کہا ہے کہ حکومت لیگل ٹیم کے ساتھ مشرف غداری کیس کے فیصلے کو دیکھے گی۔

فردوس عاشق اعوان کا کہنا تھا کہ تفصیلی جائزہ لینے کے بعد حکومتی بیانیہ سامنے لایا جائے گا۔

اسلام آباد میں ایک تقریب میں شرکت کے بعد فردوس عاشق اعوان کا کہنا تھا کہ انہوں نے پرویز مشرف کی سزائے موت کا سنا ہے لیکن ابھی پوری خبر کا پتہ چلنے دیں۔

انہوں نے کہا کہ حکومت اپنی قانونی ماہرین کی ٹیم کے ساتھ بیٹھ کر اس فیصلے کے قانونی اور سیاسی پہلوں کو دیکھے گی جس کے بعد حکومتی بیانیہ سامنے لایا جائے گا۔

وزیراعظم بدھ کو واپس آرہے ہیں وہ اس کے لیگل فریم ورک کو دیکھیں گے۔

واضح رہے کہ خصوصی عدالت نے سنگین غداری کیس میں سابق صدر جنرل ریٹائرڈ پرویز مشرف کو سزائے موت کا حکم دے دیا۔

خصوصی عدالت کے سربراہ جسٹس وقار سیٹھ نے سنگین غداری کیس کا مختصر فیصلہ سنایا۔

خصوصی عدالت کے 3 رکنی بنچ نے دو ایک کی اکثریت سے یہ فیصلہ دیا جبکہ اس پر ایک جج نے اختلاف کیا۔