خضدار میں سیکیورٹی فورسز کا انٹیلیجنس بیسڈ آپریشن، 10 دہشتگرد ہلاک

خضدار(ڈیلی اردو) بلوچستان کے شورش زدہ ضلع خضدار میں سیکیورٹی فورسز نے خضدار کے شور پرود کے پہاڑی علاقے میں دہشتگردوں کی موجودگی کی اطلاع پر انٹیلیجنس بیسڈ آپریشن کیا، جس کے دوران فائرنگ کے تبادلے میں 10 دہشتگرد ہلاک جبکہ متعدد زخمی ہوگئے۔

سیکیورٹی ذرائع کے مطابق کارروائی دہشتگردوں کی موجودگی کی خفیہ اطلاع پر کی گئی۔ فورسز نے علاقے میں دہشتگردوں کے مختلف ٹھکانوں کو گھیرے میں لے کر مؤثر کارروائی کی، جس کے نتیجے میں 10 دہشتگرد مارے گئے۔

ذرائع کا کہنا ہے کہ دہشتگرد تین چھوٹی پارٹیوں کی صورت میں علاقے میں موجود تھے۔ آپریشن کے بعد سیکیورٹی فورسز نے علاقے میں سرچ اینڈ کلیئرنس کارروائیاں مزید تیز کردی ہیں، جبکہ فرار ہونے والے دہشتگردوں کی تلاش بھی جاری ہے۔

سیکیورٹی فورسز نے علاقے کو محفوظ بنانے اور دہشتگردوں کے مکمل خاتمے تک کارروائیاں جاری رکھنے کے عزم کا اظہار کیا ہے۔