خیبر: باڑہ میں دہشت گردوں کی فائرنگ سے دو ایف سی اہلکار ہلاک

باڑہ (نمائندہ ڈیلی اردو/ٹی این این) صوبہ خیبر پختونخوا کے قبائلی ضلع خیبر میں دہشت گردوں نے فرنٹیئر کور (ایف سی) پر فائرنگ کی ہے جس کے نتیجے میں دو اہلکار ہلاک ہوگئے۔

سرکاری ذرائع کے مطابق اپر باڑہ سپاہ غیبی نیکہ ایریا میں نامعلوم دہشت گردوں نے فرنٹیئر کور (ایف سی) پر فائرنگ کی ہے جس کے نتیجے میں گل خان نیک اور نور محمد ہلاک ہوگئے۔

ہلاک اہلکاروں کو قریبی ہسپتال منتقل کردیا گیا ہے۔ فائرنگ کے بعد سکیورٹی فورسز نے علاقے کو گھیرے میں لے کر سرچ آپریشن شروع کردی ہے۔

دریں اثنا دو مختلف بیانات میں پاکستانی طالبان کے دو دھڑوں کالعدم تنظیم لشکر اسلام اور کالعدم تنظیم تحریک طالبان پاکستان نے مشترکہ کارروائی کے طور پر حملے کا دعویٰ کیا۔

یاد رہے گزشتہ شب ڈیرہ اسماعیل خان میں پولیس نے چیک پوسٹ پر دہشتگردوں کا حملہ ناکام بنادیا، اہلکاروں کی بروقت جوابی فائرنگ سے دہشتگرد فرار ہوگئے۔

پولیس کے مطابق دہشتگردوں نے رات 9 بجے کے قریب چونڈا پولیس چیک پوسٹ پر حملہ کیا، جس پر فوری ردعمل دیتے ہوئے پولیس اہلکاروں نے بھی جوابی فائرنگ شروع کردی جس کے بعد دہشتگرد فرار ہوگئے۔

پولیس کے مطابق پولیس چیک پوسٹ پر دہشتگردوں کی فائرنگ سے کوئی جانی نقصان نہیں ہوا، دہشتگردوں کی تلاش کیلئے علاقے میں سرچ آپریشن جاری ہے۔