خیبر میں پولیس چیک پوسٹ پر دہشت گردوں کا حملہ، 4 اہلکار زخمی، ایک کی حالت تشویشناک

باڑہ (ہجرت علی آفریدی) صوبہ خیبر پختونخوا کے قبائلی ضلع خیبر میں پولیس چیک پوسٹ پر دہشت گردوں نے حملہ کیا ہے۔

تفصیلات کے مطابق گزشتہ رات برقمبرخیل سرکی کمر میں قیمت خان نامی پولیس چیک پوسٹ پر دہشت گردوں کے حملے کے نتیجے میں چار پولیس اہلکار زخمی ہو گئے۔ ہسپتال ذرائع کے مطابق زخمیوں میں شفیع اللہ، نسیم خان، خیال زار اور زرمین گل آفریدی شامل ہیں۔

زخمی اہلکاروں کو حیات آباد میڈیکل کمپلیکس پشاور منتقل کیا گیا ہے جہاں انہیں طبی امداد دی جا رہی ہے۔

زرمین گل نامی پولیس اہلکار کی حالت تشویشناک ہے۔

حکام نے ڈیلی اردو کو بتایا کہ پولیس اور سیکورٹی فورسز نے علاقے میں سرچ آپریشن شروع کر دیا ہے۔ جبکہ چیک پوسٹ پر حملے کے بعد دہشت گرد باآسانی فرار ہونے میں کامیاب ہوگئے۔