خیبر پختونخوا: سوات میں دوبارہ طالبان کی آمد، قومی امن جرگہ میں مزاحمت کا عندیہ

سوات (ڈیلی اردو) صوبہ خیبر پختونخوا کے سوات میں ایک بار پھر طالبان کی آمد اور لوگوں میں تشویش پھیلنے کے باعث سوات پریس کلب میں قومی جرگہ کا انعقاد کیا گیا۔

سوات قومی جرگہ میں پی ٹی آئی کے علاوہ تمام پارٹیوں کے ترجمان، وکلا برادری، تاجر برادری اور سول سوسائٹی کے افراد شریک ہوئے۔

سوات قومی جرگہ کے زیر اہتمام سوات قومی کانفرنس سوات پریس کلب شروع ہوگیا ہے جس میں تمام پارٹیوں،سول سوسائٹی اور مختلف مکاتب فکر سے تعلق رکھنے والے افراد شریک ہے pic.twitter.com/GQbNmkLYLP

— Sherin Zada شیرین زادہ (@sherinzada) August 17, 2022

مقررین نے اپنے خطاب میں کہا کہ اب کی بار طالبان کو سوات میں پنپنے کا موقع بالکل نہیں دیا جائے گا۔

سوات کے تحصیل مٹہ کے پہاڑی علاقہ کنالہ بالاسور میں طالبان کی موجودگی کی خبر نے اہلِ سوات کی نیندیں حرام کر دیں۔

میڈیا اور سوشل میڈیا پر عوامی غم و غصے کے اظہار نے پولیس اور سیکیورٹی اداروں کو حرکت کرنے پر مجبور کردیا۔

اسی اثنا میں سوات قومی جرگہ کی طرف سے آج سوات قومی جرگے کی کال دی گئی تھی۔

کانفرنس سے خطاب کرتے ہوئے مقررین نے کہا کہ اپنے بچوں کے بہتر مستقبل کو مدنظر رکھ کر ہم یہ عہد کرتے ہیں کہ اس بار سوات میں طالبان کو متحد نہیں ہونے دیں گے۔

“ہم نے امن بحال رکھنے کی خاطر جان و مال کی قربانیاں دی ہیں۔ ہمارے شہیدوں کا خون بھی ابھی خشک نہیں ہوا ہے کہ دوبارہ ایک منظم سازش کے تحت طالبان نامی بلا نمودار ہوئی۔”

قومی جرگہ میں کہا گیا کہ یہ ہماری پولیس اور سیکورٹی اداروں کی کارکردگی پر ایک طرح سے سوالیہ نشان ہے۔ اگر سوات کے حالات دوبارہ خراب کرنے کی کوشش کی گئی، تو سوات قومی جرگہ اور سوات کے عوام سخت ترین مزاحمت کریں گے۔