خیبر پختونخوا میں دہشت گردی کے متعدد واقعات، 15 دہشت گرد ہلاک، پولیس اہلکار سمیت متعدد افراد زخمی

پشاور (ڈیلی اردو رپورٹ) پاکستان کے شورش زدہ صوبہ خیبر پختونخوا میں دہشت گردی اور سکیورٹی سے متعلق مختلف واقعات میں کم از کم 15 دہشت گرد ہلاک ہوگئے، جبکہ ایک پولیس اہلکار ہلاک، متعدد سکیورٹی اہلکار زخمی اور دو خواتین بھی بم دھماکے میں شدید زخمی ہوگئیں۔

پولیس اور سکیورٹی حکام کے مطابق صوبے کے مختلف اضلاع میں دہشت گردوں کے خلاف کارروائیاں، ٹارگٹ کلنگ اور فائرنگ کے واقعات پیش آئے، جبکہ بعض علاقوں میں سرچ اور کلیئرنس آپریشن بھی جاری ہے۔

اپر دیر میں 15 دہشت گرد ہلاک

ضلع اپر دیر کے علاقے بریکوٹ میں پولیس اور سکیورٹی فورسز نے مشترکہ کارروائی کرتے ہوئے 15 مبینہ دہشت گردوں کو ہلاک کردیا، جبکہ متعدد دیگر حملہ آوروں کے زخمی ہونے کی اطلاعات ہیں۔

پولیس کے مطابق پولیس اور سکیورٹی فورسز کا مشترکہ قافلہ دوبانڈو چیک پوسٹ کی جانب جا رہا تھا کہ بریکوٹ گاؤں کے قریب کالعدم تحریک طالبان پاکستان (ٹی ٹی پی) سے وابستہ دہشت گردوں نے قافلے پر حملے کی کوشش کی۔

سکیورٹی فورسز اور پولیس نے حملے کی کوشش ناکام بناتے ہوئے فوری جوابی کارروائی کی۔ حکام کے مطابق فائرنگ کے تبادلے میں 15 حملہ آور ہلاک جبکہ متعدد زخمی ہوگئے۔

واقعے کے بعد سکیورٹی فورسز نے علاقے کو گھیرے میں لے لیا اور ممکنہ دہشت گردوں کی موجودگی اور فرار کے راستوں کی تلاش کے لیے سرچ اور کلیئرنس آپریشن شروع کردیا۔

بنوں میں دو دہشت گرد ہلاک

ضلع بنوں میں کاؤنٹر ٹیررازم ڈیپارٹمنٹ (سی ٹی ڈی) اور ضلعی پولیس نے تھانہ ڈومیل کی حدود میں اکبر علی خان کلے اور ملحقہ علاقوں میں دہشت گردوں کے خلاف کارروائی کی۔

پولیس کے مطابق سی ٹی ڈی کی اسپیشل ویپن اینڈ ٹیکٹکس (SWAT) ٹیموں اور ضلعی پولیس نے دہشت گردوں کا تعاقب کیا، جس کے دوران دونوں جانب سے شدید فائرنگ کا تبادلہ ہوا۔

فائرنگ کا سلسلہ کافی دیر تک جاری رہا۔ بعد ازاں علاقے میں سرچ آپریشن کیا گیا، جس کے دوران دو دہشت گردوں کی ہلاکت کی تصدیق ہوئی۔

پولیس کے مطابق ایک دہشت گرد کی لاش برآمد کرلی گئی، جبکہ دوسرے دہشت گرد کی لاش اس کے ساتھی اپنے ساتھ لے گئے۔

حکام نے بتایا کہ ہلاک دہشت گردوں کی شناخت کا عمل جاری ہے۔

سرچ آپریشن کے دوران دہشت گردوں کے قبضے سے ایک سنائپر رائفل اور ایم فور رائفل بھی برآمد کی گئی۔ علاقے میں مزید سرچ اور کلیئرنس آپریشن جاری ہے۔

بنوں میں ٹی ٹی پی کا مطلوب کمانڈر ’گیدڑ‘ ہلاک

ضلع بنوں میں پولیس اور سی ٹی ڈی کی ایک اور کارروائی کے دوران کالعدم تحریک طالبان پاکستان کا انتہائی مطلوب دہشت گرد کمانڈر ’گیدڑ‘ ہلاک ہوگیا۔

ڈسٹرکٹ پولیس آفیسر محمد فرقان بلال نے کارروائی کی تصدیق کرتے ہوئے بتایا کہ پولیس اور سی ٹی ڈی کے مشترکہ آپریشن میں انتہائی مطلوب دہشت گرد کمانڈر مارا گیا۔

حکام کے مطابق کارروائی کے حوالے سے مزید تفصیلات اور ہلاک کمانڈر کی شناخت سے متعلق معلومات جمع کی جا رہی ہیں۔

بنوں میں دو افراد کی لاشیں برآمد

ضلع بنوں کی تحصیل ڈومیل میں سڑک کنارے سے دو افراد کی لاشیں برآمد ہوئی ہیں۔

مقامی ذرائع کے مطابق بخمالی پٹرول پمپ کے قریب سدا خیل روڈ سے دونوں لاشیں ملی ہیں۔ ابتدائی اطلاعات کے مطابق مقتولین کا تعلق مہمند خیل سے بتایا جا رہا ہے۔

پولیس نے شبہ ظاہر کیا ہے کہ دونوں افراد کو دہشت گردوں نے فائرنگ کرکے ہلاک کیا، تاہم واقعے کی حتمی وجہ اور قاتلوں کی شناخت تحقیقات مکمل ہونے کے بعد ہی واضح ہوگی۔

پولیس نے لاشوں کو تحویل میں لے کر واقعے کی تفتیش شروع کردی ہے۔

واضح رہے کہ گزشتہ روز بھی اسی علاقے میں نامعلوم دہشت گردوں نے فائرنگ کرکے ایک فرنٹیئر کور (ایف سی) اہلکار کو ہلاک کردیا تھا۔

چارسدہ میں ایلیٹ فورس اہلکار ٹارگٹ کلنگ میں ہلاک

ضلع چارسدہ میں نامعلوم مسلح موٹر سائیکل سواروں نے فائرنگ کرکے ایلیٹ فورس کے ایک اہلکار کو ہلاک کردیا، جبکہ فائرنگ کی زد میں آکر ایک رکشہ ڈرائیور زخمی ہوگیا۔

پولیس کے مطابق واقعہ تھانہ سٹی کی حدود پٹکی چوک میں پیش آیا، جہاں نامعلوم مسلح افراد نے چنگ چی رکشے پر فائرنگ کی۔

فائرنگ کے نتیجے میں پشاور میں تعینات ایلیٹ فورس کے اہلکار ضیاء اللہ ہلاک ہوگئے، جبکہ رکشہ ڈرائیور زخمی ہوگیا۔

واقعے کے بعد پولیس نے علاقے کو گھیرے میں لے لیا اور ہلاک اہلکار کی لاش کو ڈسٹرکٹ ہیڈکوارٹر اسپتال منتقل کردیا۔

پولیس کے مطابق حملہ آور فائرنگ کے بعد موٹر سائیکل پر فرار ہوگئے۔ ملزمان کی گرفتاری کے لیے علاقے میں سرچ آپریشن شروع کردیا گیا ہے۔

ڈیرہ اسماعیل خان میں موٹر وے پولیس کے دو اہلکار زخمی

ڈیرہ اسماعیل خان میں نامعلوم مسلح افراد نے سی پیک روڈ پر موٹر وے پولیس اہلکاروں کو فائرنگ کا نشانہ بنایا، جس کے نتیجے میں دو اہلکار زخمی ہوگئے۔

پولیس کے مطابق فائرنگ کا واقعہ تھانہ کڑی خیسور کی حدود میں ونڈا یارک کے مقام پر پیش آیا، جہاں لکی مروت کی جانب سے آنے والے نامعلوم مسلح افراد نے موٹر وے پولیس اہلکاروں پر فائرنگ کردی۔

فائرنگ کے نتیجے میں حوالدار فرحان اور حوالدار کفایت اللہ زخمی ہوئے، جنہیں فوری طبی امداد کے لیے اسپتال منتقل کیا گیا۔

واقعے کی اطلاع ملتے ہی پولیس کی بھاری نفری موقع پر پہنچ گئی اور جائے وقوعہ سے شواہد اکٹھے کیے۔

پولیس نے بتایا کہ حملے میں ملوث مسلح افراد کی گرفتاری کے لیے کارروائی جاری ہے جبکہ واقعے کی قانونی اور تفتیشی کارروائی بھی کی جا رہی ہے۔

باجوڑ میں بم دھماکا، دو خواتین شدید زخمی

قبائلی ضلع باجوڑ کی تحصیل ناوگئی کے سرحدی علاقے چارمنگ میں بم دھماکے کے نتیجے میں دو خواتین شدید زخمی ہوگئیں۔

مقامی ذرائع کے مطابق دھماکا چارمنگ کے علاقے شاہ خانی میں ہوا، جس کے نتیجے میں دونوں خواتین کو شدید نوعیت کے زخم آئے۔

زخمی خواتین کو فوری طور پر تشویش ناک حالت میں اسپتال منتقل کردیا گیا، جہاں انہیں طبی امداد فراہم کی جا رہی ہے۔

دھماکے کے بعد سکیورٹی اہلکاروں نے علاقے کو گھیرے میں لے لیا اور دھماکے کی نوعیت، مقام پر نصب بارودی مواد اور واقعے میں ملوث عناصر کا تعین کرنے کے لیے تحقیقات شروع کردی ہیں۔

خیبر پختونخوا میں سکیورٹی صورتحال تشویش ناک

خیبر پختونخوا کے مختلف اضلاع میں ایک ہی عرصے کے دوران دہشت گردی کے خلاف کارروائیوں، پولیس اہلکاروں کی ٹارگٹ کلنگ، سکیورٹی اہلکاروں پر حملوں اور بم دھماکوں کے متعدد واقعات سامنے آنا صوبے کی سکیورٹی صورتحال کی سنگینی کو ظاہر کرتا ہے۔

سکیورٹی اداروں نے دہشت گردوں کے خلاف کارروائیاں مزید تیز کرنے کا اعلان کیا ہے، جبکہ مختلف علاقوں میں سرچ، کلیئرنس اور انٹیلیجنس بیسڈ آپریشنز جاری ہیں۔ حکام کا کہنا ہے کہ دہشت گردی کے واقعات میں ملوث عناصر کی گرفتاری اور ان کے نیٹ ورکس کے خاتمے کے لیے تمام دستیاب وسائل بروئے کار لائے جا رہے ہیں۔