راولپنڈی: قرآن کی بے حرمتی کے مرتکب شخص کو عمر قید کی سزا

راولپنڈی (ڈیلی اردو) صوبہ پنجاب کے ضلع راولپنڈی سے تعلق رکھنے والے ایک شخص کو انسدادِ دہشت گردی کی عدالت نے توہینِ مذہب کے الزام میں عمر قید کی سزا سنادی ہے۔

راولپنڈی کی مقامی عدالت میں قرآن پاک کے اوراق کی بے حرمتی کے کیس کی سماعت ہوئی۔ ایڈیشنل ڈسٹرکٹ اینڈ سیشن جج راجہ فیصل رشید نے جرم ثابت ہونے پر مجرم کو سزا سنائی۔

مجرم محمد جاوید کے خلاف تھانہ رتہ امرال پولیس نے 14 مارچ 2023 کو قرآن مجید کی توہین کا مقدمہ درج کیا تھا۔

عدالت نے اپنے فیصلے میں کہا کہ ایسے جرم میں مجرموں کو کسی قسم کی رعایت نہیں دی جاسکتی۔ عدالت کی جانب سے سزا سنائے جانے کے بعد مجرم کو اڈیالہ جیل منتقل کردیا گیا۔

مجرم محمد جاوید کو عدالتی ٹرائل کے دوران اپنی صفائی پیش کرنے کا بھرپور موقع فراہم کیا گیا جس کے لیے اُس نے وکلا کی خدمات بھی حاصل کیں تاہم وہ خود کو عدالت کے سامنے بے قصور ثابت کرنے میں ناکام رہا۔