رواں سال اسرائیلی فوج کے ہاتھوں 400 فلسطینی بچے گرفتار

مقبوضہ بیت المقدس (ڈیلی اردو) کلب برائے اسیران کی طرف سے جاری کردہ ایک بیان میں‌کہا گیا ہے کہ قابض صہیونی فوج کی طرف سے فلسطینی بچوں کے کریک‌ ڈاون کا سلسلہ جاری ہے۔ رواں سال کے دوران قابض فوج نے 400 فلسطینی بچوں کو بے رحمی کے ساتھ حراست میں لینے کے بعد انہیں پابند سلاسل کیا ہے۔

کلب برائے اسیران کی طرف سے بچوں کے عالمی دن کے موقعے پرعالمی برادری کی توجہ مبذول کراتے ہوئے کہا ہے کہ رواں سال یکم جنوری سے 20 اکتوبر تک اسرائیلی فوج کے ہاتھوں کم سے کم 400 فلسطینی بچوں‌کو گرفتار گیا۔

کلب برائے اسیران کا کہنا ہے کہ اسرائیلی فوج کے ہاتھوں 18 سال سے کم عمر کے 400 بچوں‌ کو گرفتار کرنے کے بعد زندانوں میں ڈالا گیا۔ گرفتار ہونے والے بچوں کی اکثریت مقبوضہ بیت المقدس سے تعلق رکھتی ہے۔

ان بچوں‌ کو اسرائیل کی دامون، عوفر اور مجد جیلوں ‌میں قید کیا گیا۔ ان میں سے 170 بچے بدستور پابند سلاسل ہیں۔

رپورٹ میں ‌کہا گیا ہے کہ صہیونی ریاست ایک سوچے سمجھے منصوبےکے تحت فلسطینی بچوں کو گرفتار کرتی ہے تا کہ ان کے تعلیمی مراحل میں رکاوٹ ڈالی جائے اور انہیں قید وبند میں ڈال کر حصول تعلیم سے محروم رکھا جائے۔

کلب برائے اسیران کا کہنا ہے کہ کرونا کی وبا کے باوجود صہیونی فوج کے ہاتھوں فلسطینی بچوں‌ کی اندھا دھند گرفتاریوں‌ کا سلسلہ جاری رہا ہے۔