روس کے یوکرین پر بڑے میزائل حملے، ہائپر سونک اور بیلسٹک میزائل استعمال کیے گئے

ماسکو (ڈیلی اردو/نیوز ایجنسیاں) روس نے یوکرین کی جانب سے کیے جانے والے حملوں میں شدت کے جواب میں یوکرین کے مختلف علاقوں پر بڑے پیمانے پر میزائل حملے کیے ہیں، جن میں عسکری اہداف، فوجی کمانڈ مراکز، فضائی اڈے اور دفاعی صنعت سے وابستہ تنصیبات کو نشانہ بنایا گیا۔

روسی وزارت دفاع کے مطابق ان حملوں میں ہائپر سونک اور بیلسٹک میزائلوں کا استعمال کیا گیا، جن میں اوریشنک، اسکندر، کنشال (Kinzhal) اور زرکون طرز کے میزائل شامل تھے۔ روسی حکام کے مطابق حملے ہفتہ اور اتوار کی درمیانی شب کیے گئے۔

روسی خبر رساں ادارے انٹرفیکس کے مطابق وزارت دفاع نے دعویٰ کیا ہے کہ حملوں کا مقصد یوکرین کی فوجی کمان، فضائیہ کے اڈوں اور ان صنعتی مراکز کو نشانہ بنانا تھا جو یوکرینی فوج کو اسلحہ اور سپلائی فراہم کرتے ہیں۔

ماسکو کا کہنا ہے کہ حالیہ دنوں میں یوکرین کی جانب سے روسی شہری اہداف پر حملوں میں اضافہ ہوا ہے، جن کے جواب میں یہ کارروائیاں کی گئیں۔ 

روسی حکام نے دعویٰ کیا کہ تمام میزائل حملے کامیاب رہے اور اپنے اہداف کو نشانہ بنایا گیا۔

روسی میڈیا کے مطابق اوریشنک طرز کے درمیانے فاصلے تک مار کرنے والے ہائپر سونک میزائل خاص طور پر اپنی رفتار اور تباہ کن صلاحیت کے باعث نمایاں سمجھے جاتے ہیں۔

دوسری جانب اتوار کی دوپہر تک یوکرینی حکومت یا فوج کی جانب سے روسی دعوؤں پر کوئی باضابطہ ردعمل سامنے نہیں آیا تھا، جبکہ آزاد ذرائع سے حملوں کے نقصانات یا اہداف کی مکمل تصدیق نہیں ہو سکی ہے۔