ریاض ایئرپورٹ حملے کی شہباز شریف اور دفتر خارجہ کی مذمت، سعودی عرب کی خودمختاری کے تحفظ کے عزم کا اعادہ

اسلام آباد(ڈیلی اردو) پاکستانی وزیرِ اعظم شہباز شریف اور دفتر خارجہ نے سعودی عرب کے دارالحکومت ریاض میں شاہ خالد انٹرنیشنل ایئرپورٹ پر حملے کی مذمت کرتے ہوئے سعودی عرب کی سلامتی، خودمختاری اور علاقائی سالمیت کے تحفظ کے لیے پاکستان کے پختہ عزم کا اعادہ کیا ہے۔

وزیرِ اعظم شہباز شریف نے اتوار کو جاری بیان میں کہا کہ پاکستان سعودی عرب کی قیادت اور برادر عوام کے ساتھ کھڑا ہے۔ انہوں نے دونوں ممالک کے دیرینہ برادرانہ تعلقات اور مشترکہ دفاعی معاہدے کا حوالہ دیتے ہوئے سعودی عرب کی خودمختاری اور علاقائی سالمیت کے تحفظ کے عزم کو دہرایا۔

دفتر خارجہ کے ترجمان نے اپنے بیان میں کہا کہ شہری املاک، ہوائی اڈوں اور اہم بنیادی ڈھانچے کو نشانہ بنانا ناقابل قبول ہے اور ایسے حملے علاقائی امن و سلامتی کے لیے سنگین خطرہ ہیں۔ ترجمان کے مطابق شہری تنصیبات پر حملوں کی عالمی سطح پر مذمت ہونی چاہیے۔

پاکستان نے مکہ میں طے پانے والے مشترکہ معاہدے اور سیاسی، دفاعی و تزویراتی کمیٹی کے حالیہ اجلاس میں کیے گئے فیصلوں کا حوالہ دیتے ہوئے واضح کیا کہ وہ سعودی عرب کی سلامتی کے معاملے پر اپنے مؤقف پر قائم ہے۔

وزیرِ اعظم اور دفتر خارجہ نے حوثی باغیوں پر زور دیا کہ وہ اس نوعیت کے حملے فوری طور پر بند کریں۔ پاکستان نے سعودی عرب کے اپنے دفاع کے حق کی حمایت کرتے ہوئے کہا کہ تشدد کے ایسے واقعات بین الاقوامی قانون کے منافی اور خطے میں امن و استحکام کی کوششوں کے لیے نقصان دہ ہیں۔