سعودی عرب میں غیر ملکیوں کیلئے شراب پر پابندی میں نرمی

ریاض (ڈیلی اردو/اے ایف پی) سعودی عرب کے دارلحکومت ریاض سے موصولہ اطلاعات کے مطابق اس قدامت پسند اسلامی سلطنت میں اب غیر ملکیوں کے لیے شراب پر عائد پابندیوں میں نرمی برتی جا رہی ہے۔ 

فرانسیسی خبر رساں ایجنسی اے ایف پی کے مطابق ریاض میں سفارت کاروں اور پریمیم ویزا رکھنے والے غیر ملکیوں نے بتایا ہے کہ سعودی عرب نے خاموشی سے مخصوص غیر مسلم غیر ملکی رہائشیوں کے لیے شراب خریدنے پر پابندیاں نرم کر دی ہیں۔

ان کے مطابق اب پریمیم ریزیڈنسی رکھنے والے افراد بھی ریاض کی واحد سرکاری شراب کی دکان سے خریداری کر سکتے ہیں، جو پہلے صرف سفارت کاروں کے لیے مخصوص تھی۔

اے ایف پی سے بات کرنے والے چار افراد، جن میں سے دو سفارتی ذرائع اور دو پریمیم ویزا ہولڈرز ہیں، نے تصدیق کی کہ وہ گزشتہ دنوں اس دکان سے شراب خریدنے میں کامیاب رہے۔ ایک شخص نے کہا کہ اس سے بلیک مارکیٹ کے مہنگے داموں سے نجات ملی ہے۔

سعودی حکام نے خبر شائع ہونے تک کوئی تبصرہ نہیں کیا۔ پریمیم ریزیڈنسی 2019 میں شروع ہوئی تھی اور یہ اُن غیر ملکیوں کے لیے ہے، جو آٹھ  لاکھ ریال فیس اور دیگر شرائط پوری کریں۔ اس کے حامل افراد کفیل کے بغیر سعودی عرب میں رہائش، کام اور سرمایہ کاری کر سکتے ہیں۔

ذرائع کے مطابق گزشتہ چند دنوں میں شراب فروخت کرنے کی مجاز دکان پر غیر معمولی رش دیکھا گیا اور کچھ لوگ درجنوں بوتلیں خریدتے دکھائی دیے۔

یہ پیش رفت اس وقت سامنے آئی ہے، جب ماضی میں ولی عہد محمد بن سلمان کے دور میں سعودی عرب نے بتدریج سماجی اور معاشی اصلاحات متعارف کرائی ہیں، اگرچہ ملک میں 1952 سے شراب پر سرکاری پابندی آج بھی برقرار ہے۔