سندھ: دادو میں کاروکاری کے الزام میں 14 سالہ بچی کو سنگسار کر دیا گیا

دادو (نمائندہ ڈیلی اردو) صوبہ سندھ کے ضلع دادو میں علاقے کے با اثر افراد نے زمانہ جاہلیت کی یادیں تازہ کردیں، ایک نابالغ لڑکی کو کاروکاری قرار دے کر سنگسار کردیا گیا۔

ضلع دادو کے کیر تھر پہاڑ کے علاقے میں 14 سالہ گل سماء کو با اثر افراد نے کاروکاری قرار دیا اور اسے سنگسار کرنے کی سزا سنائی۔ علاقہ مکینوں نے جرگے کے فیصلے کے مطابق نا بالغ لڑکی کو پتھر مار مار کر انتہائی دردناک طریقے سے قتل کردیا۔

مقتولہ بچی کے والدین نے بھی اس فیصلے کے خلاف کوئی مزاحمت نہیں کی اور بچی کی موت کو حادثہ قرار دے کر اس کی تدفین کردی۔

سرکاری ذرائع کے مطابق پولیس نے لڑکی کے والد علی نواز ولد شاہنواز رند، سمیع ولد واحد بخش رند سمیت چار نامعلوم افراد کے خلاف مقدمہ درج کر کے بچی کے والد، والدہ اور نماز جنازہ پڑھانے والے مولوی ممتاز لغاری کو گرفتار کر لیا ہے۔

آئی جی سندھ کلیم امام نے بھی دادو میں بچی کو سنگسار کرنے کے واقعے کا سخت نوٹس لیتے ہوئے ایس ایس پی دادو سے واقعے سے متعلق تمام تفصیلات طلب کر لی ہیں، انھوں نے ہدایت کی کہ تفتیش کو موثر بنا کر انصاف کی فراہمی کو یقینی بنایا جائے۔

پولیس نے لڑکی کا نمازِ جنازہ پڑھانے والے پیش امام کو بھی گرفتار کر لیا ہے جب کہ بچی کی والدہ کا دعوی ہے کہ ان کی بیٹی کی موت حادثاتی طور پر پتھریلا تودہ گرنے سے ہوئی۔

ایس پی دادو نے نمائندہ ڈیلی اردو کو بتایا کہ بچی کی قبر پر پولیس اہلکاروں کو تعینات کردیا گیا ہے، قبر کشائی کے لیے متعلقہ عدالت سے رجوع کیا جائے گا، قبر کشائی کے بعد پوسٹ مارٹم کرایا جائے گا، مختلف پہلوں سے مقدمے کی تفتیش کر رہے ہیں۔