سنٹرل کرم : ممکنہ سکیورٹی آپریشن، 31 دیہات سے آبادی کے انخلا کا خدشہ

کرم(ڈیلی اردو) خیبرپختونخواہ کے شورش زدہ قبائلی ضلع کرم میں پاڑہ چمکنی کے سرحدی اور دشوار گزار علاقے میں مبینہ دہشتگرد عناصر کے خلاف ممکنہ سکیورٹی آپریشن کی اطلاعات کے بعد 31 دیہات کے مکینوں کے ممکنہ انخلا کی تیاریاں جاری ہیں، جس کے باعث ہزاروں خاندان متاثر ہونے کا خدشہ ظاہر کیا جا رہا ہے۔ ذرائع کے مطابق پاڑہ چمکنی پاک افغان سرحد کے قریب واقع پہاڑی علاقہ ہے، جہاں دشوار جغرافیائی صورتحال کے باعث بعض مقامات پر سرحدی باڑ بھی موجود نہیں۔ ممکنہ سکیورٹی آپریشن کی اطلاعات کے بعد مقامی آبادی کی جانب سے جرگہ منعقد کیا گیا اور امن مارچ بھی کیا گیا۔ جرگے کے شرکا نے ممکنہ انخلا کی مخالفت کرتے ہوئے مطالبہ کیا کہ مسئلے کا حل طاقت کے بجائے مذاکرات کے ذریعے تلاش کیا جائے اور کسی بھی فیصلے سے قبل مقامی آبادی، عمائدین اور مشران کو اعتماد میں لیا جائے۔ ذرائع کا کہنا ہے کہ ممکنہ سکیورٹی آپریشن علاقے میں مبینہ دہشتگرد عناصر کی موجودگی کے پیش نظر زیر غور ہے، تاہم اس حوالے سے تاحال کوئی تفصیلی سرکاری مؤقف سامنے نہیں آیا۔ مقامی افراد نے حکومت سے مطالبہ کیا ہے کہ کسی بھی آپریشن یا آبادی کے انخلا سے قبل شہریوں کے تحفظ اور بنیادی ضروریات کو یقینی بنایا جائے تاکہ ہزاروں خاندانوں کو ممکنہ مشکلات سے محفوظ رکھا جاسکے۔