سوئٹزرلینڈ: امریکہ، ایران مذاکرات کا پہلا مرحلہ مکمل، 60 روز میں حتمی معاہدے کیلئے روڈ میپ پر اتفاق

برگن شٹاخ (ڈیلی اردو) سوئٹزرلینڈ میں امریکہ اور ایران کے درمیان ہونے والے تکنیکی مذاکرات کا پہلا مرحلہ مکمل ہو گیا، جہاں پاکستان اور قطر کی ثالثی میں دونوں فریقوں نے 60 روز کے اندر حتمی معاہدے تک پہنچنے کے لیے ایک مشترکہ روڈ میپ پر اتفاق کر لیا۔

پیر کے روز پاکستان اور قطر کی جانب سے جاری مشترکہ اعلامیے میں کہا گیا کہ مذاکرات کے دوران ایک اعلیٰ سطحی کمیٹی (ہائی لیول کمیٹی) کے قیام پر بھی اتفاق ہوا، جو پورے مذاکراتی عمل کی سیاسی نگرانی کرے گی، جبکہ تکنیکی سطح کے مذاکرات آئندہ پورا ہفتہ جاری رہیں گے۔

اعلامیے کے مطابق مرکزی مذاکرات کار باقاعدگی سے کمیٹی کو پیش رفت سے آگاہ کریں گے، جبکہ جوہری پروگرام، اقتصادی پابندیوں، نگرانی اور تنازعات کے حل سے متعلق ورکنگ گروپس بھی قائم کیے جائیں گے تاکہ مفاہمتی یادداشت پر مؤثر عمل درآمد یقینی بنایا جا سکے۔

پاکستان اور قطر نے بتایا کہ آبنائے ہرمز سے تجارتی جہازوں کی محفوظ آمد و رفت برقرار رکھنے اور کسی بھی غلط فہمی یا ممکنہ کشیدگی سے بچنے کے لیے ایک خصوصی "ہاٹ لائن" یا رابطہ نظام بھی قائم کرنے پر اتفاق کیا گیا ہے۔

اس سے قبل مذاکرات میں شریک ایک امریکی سفارت کار نے بتایا تھا کہ بات چیت کا اہم محور آبنائے ہرمز کی صورتحال، لبنان میں جنگ بندی پر عمل درآمد اور ایران کے حالیہ بیانات سے متعلق وضاحت حاصل کرنا تھا۔

دوسری جانب ایرانی وزیر خارجہ عباس عراقچی نے مذاکرات کو "اہم پیش رفت" قرار دیتے ہوئے کہا کہ پاکستانی اور قطری ثالثی کی بدولت لبنان میں جاری جنگ کے خاتمے کی جانب نمایاں پیش رفت ہوئی ہے۔

انہوں نے کہا کہ ایران کی تیل اور پیٹروکیمیکل برآمدات پر عائد بعض پابندیوں میں نرمی، بحری نقل و حرکت میں سہولت، بعض منجمد اثاثوں کی واگزاری اور ایران کی تعمیر نو سے متعلق منصوبوں پر بھی مثبت پیش رفت ہوئی ہے۔

عباس عراقچی کے مطابق آئندہ مرحلے میں "لبنان ڈی کنفلکشن سیل" قائم کیا جائے گا، جس کا مقصد لبنان میں کشیدگی کم کرنا اور فریقین کے درمیان طے شدہ اقدامات پر عمل درآمد کی نگرانی کرنا ہوگا۔

مشترکہ اعلامیے میں مزید کہا گیا کہ جمہوریہ لبنان، امریکہ، ایران، پاکستان اور قطر کی شمولیت سے قائم ہونے والا یہ ڈی کنفلکشن سیل لبنان میں اسرائیلی فوجی کارروائیوں کے خاتمے اور مفاہمتی یادداشت پر مکمل عمل درآمد میں معاون ثابت ہوگا۔

ثالث ممالک نے امید ظاہر کی ہے کہ منظور شدہ روڈ میپ کے تحت آئندہ 60 روز کے اندر امریکہ اور ایران کے درمیان ایک جامع اور حتمی معاہدہ طے پا سکتا ہے۔