شام: حُمص میں فرقہ وارانہ کشیدگی، جوڑا ہلاک، کرفیو نافذ

دمشق (ڈیلی اردو ) شام کے وسطی شہر حُمص میں فرقہ وارانہ کشیدگی کے پھوٹنے کے بعد حکام نے پیر کی دوپہر متعدد علاقوں میں کرفیو نافذ کر دیا۔ ہنگاموں کا آغاز اتوار کی صبح زیدل نامی علاقے میں ایک جوڑے کے ہلاک ہونے کے واقعے کے بعد ہوا۔ وزارتِ داخلہ کے مطابق مکان کی دیواروں پر فرقہ وارانہ نوعیت کی گرافیٹی بھی پائی گئی ہے۔

غیر سرکاری تنظیم شامی آبزرویٹری برائے انسانی حقوق کے مطابق جوڑے کے ہلاک ہونے اور فرقہ وارانہ گرافیٹی نے لواحقین میں شدید غم و غصہ پیدا کیا، جس کے بعد ان کے قبیلے بنی خالد کے مسلح افراد نے حُمص کے اکثریتی علوی آبادی والے علاقوں میں پرتشدد حملے کیے۔ اس صورتحال کے پیشِ نظر حکام نے فوری طور پر ان علاقوں میں کرفیو نافذ کیا۔

آبزرویٹری کے مطابق مسلح افراد موٹرسائیکلوں پر متعدد علاقوں میں داخل ہوئے، گاڑیوں، دکانوں اور دیگر املاک کو نقصان پہنچایا اور شہریوں پر حملے کیے۔

سرکاری خبر رساں ایجنسی کے مطابق تشدد کے واقعات میں 18 افراد زخمی ہوئے ہیں، جبکہ سکیورٹی فورسز کو شہر بھر میں تعینات کر دیا گیا ہے۔

حُمص کی داخلی سکیورٹی کے سربراہ مورہف الناسان کا کہنا ہے کہ سکیورٹی ادارے جوڑے کے ہلاک ہونے کے واقعے کی تحقیقات کر رہے ہیں۔ 

گزشتہ سال طویل عرصے سے برسراقتدار آمر بشارالاسد کو معزول کرنے والے باغیوں کے سربراہ اور موجودہ عبوری صدر احمد الشرع نے ملک میں اقلیتوں کے تحفظ کا وعدہ کیا تھا، تاہم اس کے باوجود متعدد مہلک فرقہ وارانہ واقعات پیش آ چکے ہیں۔