شام میں اسرائیلی آپریشن: دس جنگجو ہلاک، فائرنگ میں چھ اسرائیلی فوجی زخمی

دمشق (ڈیلی اردو) شام نے تازہ اسرائیلی فوجی کارروائی کی سخت مذمت کرتے ہوئے اسے ’’جنگی جرم‘‘ قرار دیا ہے۔ 

شامی وزارتِ خارجہ نے اپنے بیان میں کہا کہ ’’شام اسرائیلی فوج کی مجرمانہ جارحیت کی مذمت کرتا ہے‘‘ اور یہ کہ ایسے اقدامات کا مقصد خطے کو ایک نئے تصادم میں دھکیلنا ہے۔

اس سے قبل جمعہ کے روز جنوبی شام میں اسرائیلی دفاعی افواج کی کارروائی میں دس افراد ہلاک ہو گئے۔ اسرائیلی فوج کے مطابق یہ کارروائی ایک شدت پسند گروہ کو نشانہ بنانے کے لیے کی گئی تھی۔

شامی سرکاری ٹیلی ویژن کے مطابق یہ واقعہ بشار الاسد کے اقتدار کے خاتمے کے بعد گزشتہ تقریباً ایک سال میں سب سے مہلک حملہ ہے، اور ہلاک شدگان میں خواتین اور بچے بھی شامل ہیں۔

اسرائیلی فوج کا کہنا ہے کہ لبنان سے تعلق رکھنے والے جنگجوؤں کو گرفتار کرنے کے لیے شام کے گاؤں بیت جن میں کیے گئے آپریشن کے دوران فائرنگ کے تبادلے میں چھ اسرائیلی فوجی زخمی ہوئے، جن میں سے تین کی حالت تشویش ناک ہے۔

فوج کے مطابق اس کارروائی کا ہدف لبنان میں فعال شدت پسند گروہ جماعتِ اسلامیہ کے جنگجو تھے، جو مبینہ طور پر جنوبی شام کے علاقے بیت جن میں سرگرم تھے اور ’’اسرائیلی شہریوں پر دہشت گرد حملوں کی منصوبہ بندی‘‘ کر رہے تھے۔

دسمبر 2024 میں بشار الاسد کے اقتدار سے ہٹنے اور دمشق میں نئی قیادت آنے کے بعد سے اسرائیل شام میں سیکڑوں حملے اور کارروائیاں کر چکا ہے۔

اسرائیل نے اقوامِ متحدہ کے زیرِ نگرانی 1974 کے بفر زون میں بھی فوجی تعینات کر دیے ہیں۔ یہ زون گولان کی پہاڑیوں پر اسرائیلی اور شامی افواج کو الگ رکھتا ہے۔ واضح رہے کہ اسرائیل نے 1967 کی جنگ میں گولان کی پہاڑیاں قبضے میں لیں اور 1981 میں انہیں ضم کر لیا، جسے عالمی برادری نے کبھی تسلیم نہیں کیا۔