شمالی وزیرستان میں فوجی قافلے پر خودکش حملہ، 21 اہلکار زخمی

اسلام آباد (ش ح ط) صوبہ خیبر پختونخوا کے قبائلی ضلع شمالی وزیرستان کے میرعلی میں سیکورٹی فورسز کی کانوائے پر خودکش حملہ کے نتیجے میں 21 سیکورٹی اہلکار زخمی ہوگئے۔

حکام کے مطابق منگل کی دوپہر میرعلی بائی پاس پر مبینہ موٹر سائیکل سوار خودکش حملہ آور نے اس وقت اپنے جسم سے بندھے بارودی مواد میں دھماکہ کیا جب وہاں سے سکیورٹی فورسز کی گاڑیوں پر مشتمل ایک قافلہ گزر رہا تھا۔

شمالی وزیرستان کی تحصیل میرعلی میں فوجی کانوائے پر خودکش حملہ، اطاعات کے مطابق خودکش حملہ میرعلی بائی پاس روڈ پر ہوا، قافلہ بنوں سے میران شاہ جارہا تھا، متعدد اہلکار زخمی، ہلاکتوں کا خدشہ ہے۔ #Mirali #NorthWaziristan #Pakistan

— Shabbir Hussain Turi (@ShabbirTuri) September 27, 2022

دھماکہ اس قدر شدید تھا کہ اس سے قافلے میں شامل کئی گاڑیوں کو نقصان پہنچا۔

سرکاری ذرائع کے مطابق واقعہ دوپہر کے 3 سے 4 بجے کے درمیان میر علی روڈ پر پیش آیا جہاں خودکش حملہ آؤر نے فوجی قافلے کو نشانہ بنانے کے لئے گاڑی کے قریب آکر خود کو اُڑا لیا جس کے نتیجے میں 21 فوجی زخمی ہوگئے۔

سرکاری ذرائع کے مطابق فوجی کافلہ بنوں سے میرانشاہ جارہا تھا۔

حملے میں زخمی ہونے والے فوجی جوانوں کو طبی امداد فراہم کرنے کے لئے میر علی ہیڈ کوارٹر ہسپتال منتقل کردیا گیا ہے۔ جہاں بعض کی حالت تشویش ناک بتائی جاتی ہے۔

ذرائع کا کہنا ہے کہ جائے وقوعہ پر اضافی نفری موجود ہے، علاقے میں فورسز کی جانب سے سرج آپریشن جاری ہے۔

رواں سال شمالی وزیرستان میں یہ پانچواں خودکش حملہ ہے۔

خیال رہے کہ گزشتہ روز جنوبی وزیرستان کے علاقے اعظم ورسک میں فائرنگ کے نتیجے میں دو سکیورٹی اہلکار ہلاک ہوگئے تھے۔

ابھی تک کسی فرد یا گروہ نے حملے کی ذمہ داری قبول نہیں کی ہے۔