عباس عراقچی کی بغداد میں عراقی وزیرِاعظم سمیت اعلیٰ قیادت سے اہم ملاقاتیں

بغداد (ڈیلی اردو) ایران کے وزیرِ خارجہ عباس عراقچی نے عراق کے سرکاری دورے کے دوران بغداد میں اعلیٰ عراقی قیادت سے ملاقاتیں کی ہیں، جن میں خطے کی مجموعی سکیورٹی صورتحال، کشیدگی میں کمی اور دوطرفہ تعلقات کے فروغ پر تبادلہ خیال کیا گیا۔

عراقی وزیرِ اعظم علی الزیدی سے ملاقات میں عباس عراقچی نے خطے میں جنگ کے خاتمے کے لیے سفارتی کوششوں کی اہمیت پر زور دیا۔ انہوں نے کہا کہ علاقائی ممالک کو اس بات کو یقینی بنانا چاہیے کہ ان کی سرزمین کسی دوسرے ملک کے خلاف استعمال نہ ہو اور خطے میں استحکام کے لیے مشترکہ کوششیں ضروری ہیں۔

عراقی وزیرِ اعظم کے دفتر کی جانب سے جاری بیان کے مطابق علی الزیدی نے خطے میں جنگ کے خاتمے کے لیے سفارتی کوششوں کا خیرمقدم کیا اور کہا کہ عراق تنازعات کے حل کے لیے مذاکرات اور سفارت کاری کی حمایت کرتا ہے۔

ایرانی خبر رساں ادارے ارنا کے مطابق ملاقات میں ایران اور امریکہ کے درمیان جاری سفارتی پیش رفت، خطے میں سکیورٹی صورتحال اور استحکام کے لیے علاقائی و بین الاقوامی کوششوں پر بھی گفتگو ہوئی۔ ان نکات میں ریاستوں کی خودمختاری کے احترام اور علاقائی سالمیت کے تحفظ پر زور دیا گیا۔

عباس عراقچی نے اس موقع پر عراق کے ساتھ تعلقات کے فروغ اور مختلف شعبوں میں تعاون کو مزید وسعت دینے کے عزم کا اعادہ کیا۔

اس سے قبل انہوں نے بغداد میں عراقی وزیرِ خارجہ فؤاد حسین سے بھی ملاقات کی تھی، جس میں دوطرفہ تعلقات اور خطے کی صورتحال پر تفصیلی بات چیت کی گئی۔

دوسری جانب ایران کے وزارتِ خارجہ کے ترجمان اسماعیل بقائی کے حوالے سے کہا گیا ہے کہ ایران خطے میں کشیدگی کے خاتمے اور لبنان میں اسرائیلی فوجی کارروائیوں کے خاتمے کا حامی ہے۔

ترجمان کے مطابق ایران کا مؤقف ہے کہ کسی بھی ممکنہ علاقائی مفاہمت کے لیے اسرائیلی کارروائیوں کا خاتمہ اور مقبوضہ علاقوں سے انخلا بنیادی اہمیت رکھتا ہے، جبکہ ایران لبنان کی خودمختاری اور علاقائی سالمیت کی حمایت جاری رکھے گا۔