غزہ میں اسرائیلی حملوں ميں 12 بچوں سمیت 32 فلسطینی ہلاک

غزہ + یروشلم (ڈیلی اردو) حماس کے زیرانتظام غزہ سول ڈیفنس ایجنسی کے مطابق ہفتے کو اسرائیلی فوجی کارروائیوں میں کم از کم 32 افراد ہلاک ہوگئے۔

غزہ کے طبی ذرائع کے مطابق ہفتے کو غزہ سٹی میں اسرائیلی فضائی حملوں میں کم از کم 32 افراد ہلاک ہو گئے، جن میں 12 بچے بھی شامل ہیں۔

حالیہ دنوں میں اسرائیلی فوج نے غزہ شہر پر حملے تیز کر دیے ہیں اور کئی بلند عمارتیں تباہ کر دی ہیں۔  اسرائیل کا الزام ہے کہ حماس نے ان عمارتوں میں نگرانی کا سامان نصب کر رکھا تھا۔ اسرائیل فوج

 مقامی افراد سے شہر خالی کرنے کا مطالبہ کر رہی ہے۔ اسرائیل غزہ سٹی کو حماس کا آخری گڑھ قرار دیتا ہے۔

طبی حکام کے مطابق غزہ سٹی کے شیخ رضوان محلے میں ایک حملے میں ایک ہی خاندان کے 10 افراد ہلاک ہو گئے، جن میں ایک ماں اور اس کے تین بچے شامل تھے۔ 

امدادی کارکنوں کے مطابق بڑھتے حملوں اور انخلا کی اپیلوں کے بعد حالیہ ہفتوں میں شہر سے نکلنے والوں کی تعداد میں تیزی آئی ہے، تاہم کئی خاندان لاگت یا بار بار بے گھر ہونے کے خوف سے اب بھی غزہ سٹی میں ٹھہرے رہنے پر مصر ہیں۔

اقوام متحدہ اور عالمی برادری کے کئی ارکان نے خبردار کیا ہے کہ غزہ سٹی پر یہ شدید حملے پہلے سے ہی تباہ حال انسانی صورتحال کو مزید بگاڑ دیں گے، جہاں  اقوام متحدہ پہلے ہی قحط کا اعلان کر چکی ہے۔

برطانیہ، فرانس اور جرمنی نے ایک مشترکہ بیان میں فوری طور پر اس فوجی کارروائی کو روکنے کا مطالبہ کیا ہے، ان کا کہنا ہے کہ اس سے شہری ہلاکتیں ہو رہی ہیں اور بنیادی ڈھانچا تباہ ہو رہا ہے۔

اسرائیلی فوج کا کہنا ہے کہ وہ غزہ سٹی میں ’’دہشت گردوں کے انفراسٹرکچر اور بلند عمارتوں‘‘ پر وسیع حملے جاری رکھے ہوئے ہے۔

اسرائیلی فوج کے مطابق گزشتہ چند ہفتوں میں شدید حملوں کے بعد غزہ کے سب سے بڑے شہری مرکز غزہ سٹی سے ڈھائی لاکھ سے زائد افراد دیگر علاقوں کی طرف منتقل ہو گئے ہیں۔

فوج کے عربی ترجمان کرنل اوِخائے اَدرعی نے ایکس پر لکھا، ’’ فوجی اندازوں کے مطابق، اپنی سلامتی کے پیشِ نظر غزہ سٹی کے ایک چوتھائی سے زیادہ باشندے شہر چھوڑ چکے ہیں۔‘‘