غزہ میں اسرائیل فوج کی فائرنگ سے یونیسیف کے دو ڈرائیور ہلاک، اقوام متحدہ

نیو یارک (ڈیلی اردو) اقوام متحدہ کے بچوں کے امدادی ادارے (یونیسیف) کا کہنا ہے کہ جمعہ کے روز غزہ پٹی میں اسرائیلی فائرنگ کے نتیجے میں اس ادارے کے ساتھ منسلک دو ڈرائیورز ہلاک ہو گئے۔ ادارے کے مطابق یہ واقعہ ایک ایسے وقت میں پیش آیا جب وہاں جنگ بندی نافذ تھی۔

یونیسیف نے ایک بیان میں کہا، ’’یونیسیف ان ہلاکتوں پر شدید غم و غصے کا اظہار کرتا ہے۔‘‘ بیان میں وضاحت کی گئی کہ یہ دونوں اہلکار شمالی غزہ میں ’’المنصورہ واٹر فلنگ پوائنٹ‘‘ پر عوام کو صاف پانی کی فراہمی کی کوشش کر رہے تھے۔ یونیسیف کے مطابق اس واقعے میں دو دیگر افراد زخمی بھی ہوئے ہیں۔

ادارے نے مزید بتایا کہ یہ واٹر فلنگ اسٹیشن اس وقت غزہ شہر کو پانی فراہم کرنے والی لائن کے لیے’’واحد فعال ٹرک فلنگ پوائنٹ‘‘ ہے۔ ادارے کے مطابق اس معمول کی کارروائی کے دوران طریقہ کار میں کسی قسم کی کوئی تبدیلی نہیں کی گئی تھی۔

اقوام متحدہ کے اس ادارے نے اسرائیل سے اس واقعے کی تحقیقات کا مطالبہ کیا ہے۔ تنظیم کا کہنا ہے، ’’امدادی کارکنوں، ناگزیر خدمات فراہم کرنے والوں اور سویلین انفراسٹرکچر کو کبھی بھی حملوں کا نشانہ نہیں بنایا جانا چاہیے۔‘‘

جرمن خبر رساں ادارے ڈی پی اے کے مطابق اسرائیلی فوج نے ایک استفسار کے جواب میں کہا ہے کہ وہ ان الزامات کا جائزہ لے رہی ہے۔