غزہ میں روزانہ اوسطاً 560 ٹن امداد پہنچ رہی ہے، اقوام متحدہ

جنیوا (ڈیلی اردو) اقوام متحدہ کے ورلڈ فوڈ پروگرام کے مطابق دو سالہ جنگ سے تباہ شدہ غزہ پٹی میں فائر بندی کے بعد روزانہ اوسطاً 560 ٹن خوراک اور امدادی سامان پہنچ رہا ہے، تاہم اس امداد کی یومیہ ترسیل میں اضافے کی اشد ضرورت ہے۔

اقوام متحدہ کے انڈر سیکرٹری جنرل ٹام فلیچر نے جمعہ 17 اکتوبر کو جنیوا میں بتایا کہ غزہ کے کئی حصوں میں اب بھی قحط جاری ہے۔ ان کے دفتر کے مطابق لاکھوں فلسطینیوں کی بنیادی ضروریات پوری کرنے کے لیے ہر ہفتے امدادی سامان سے لدی ہزاروں گاڑیوں کی ترسیل ضروری ہے، لیکن موجودہ حالات میں یہ ممکن نہیں ہو رہا۔

فلیچر کے ترجمان نے کہا کہ کل 57 امدادی ٹرک جنوبی اور وسطی غزہ تک پہنچے، جو بڑی کامیابی ہے، لیکن غزہ سٹی اور شمالی غزہ تک امداد پہنچانے میں اب بھی مشکلات موجود ہیں، اور روزانہ 80 سے 100 ٹرک کی ضرورت ہے۔