فلسطینی اتھارٹی کی جانب سے آسٹریلیا میں یہودی مذہبی تقریب پر حملے کی شدید مذمت

غزہ (ڈیلی اردو/وفا/ڈی پی اے)  فلسطینی اتھارٹی نے سڈنی کی بونڈائی بیچ پر حنوکہ کی ایک یہودی مذہبی تقریب کے دوران دو مسلح افراد کی طرف سے فائرنگ کے ہلاکت خیز واقعے کی سخت مذمت کی ہے۔

فلسطینی خبر رساں ایجنسی وفا کے مطابق فلسطینی اتھارٹی نے اپنے ایک بیان میں ہر قسم کی انتہا پسندی اور دہشت گردی، خصوصاً عام شہریوں کے قتل کو مسترد کرتے ہوئے متاثرین کے اہل خانہ، آسٹریلوی حکومت اور عوام سے اظہارِ تعزیت کیا اور زخمیوں کی جلد صحت یابی کے لیے دعا کی۔ بیان میں غزہ پٹی اور مغربی کنارے میں اسرائیل کی جانب سے فلسطینی شہریوں کی ہلاکتوں کی بھی مذمت کی گئی۔

ادھر اسرائیلی وزیر اعظم بینجمن نیتن یاہو نے آسٹریلیا پر یہود دشمنی کے خلاف مؤثر کارروائی نہ کرنے کا الزام لگاتے ہوئے کہا کہ فلسطینی ریاست کو تسلیم کرنے جیسے اقدامات یہود مخالف جذبات کو ہوا دیتے ہیں۔ نیتن یاہو کے مطابق انہوں نے چار ماہ قبل وزیر اعظم انتھونی البانیزی کو ایک خط لکھ کر خبردار کیا تھا کہ آسٹریلوی پالیسیوں سے یہود دشمنی کو تقویت مل رہی ہے۔

نیتن یاہو نے ایک راہگیر کی جرأت مندانہ کارروائی کو سراہا جس نے ایک حملہ آور کو اسلحے سے محروم کیا اور بتایا کہ وہ شخص ایک مسلمان تھا۔ انہوں نے مغربی ممالک سے مطالبہ کیا کہ یہود دشمنی کے خلاف سخت اقدامات کیے جائیں۔

یہ بیانات ایسے وقت پر سامنے آئے ہیں جب غزہ پٹی کی جنگ کے تناظر میں کئی ممالک بشمول آسٹریلیا نے رواں سال ریاست فلسطین کو تسلیم کیا ہے۔ اسرائیل کا موقف ہے کہ اس سے یہودیوں کے خلاف تشدد کی حوصلہ افزائی ہوتی ہے جبکہ فلسطینی اتھارٹی ہر قسم کے تشدد اور شہریوں کے قتل کی مخالفت پر زور دیتی ہے۔