لال قلعہ دھماکہ کیس: این آئی اے نے 13 ملزمان کے خلاف چارج شیٹ عدالت میں جمع کرا دی

نئی دہلی(ڈیلی اردو) بھارت کی قومی تحقیقاتی ایجنسی (این آئی اے) نے لال قلعہ دھماکہ کیس میں 13 ملزمان کے خلاف چارج شیٹ عدالت میں پیش کردی ہے۔ چارج شیٹ میں عمران نبی (متوفی)، عامر راشد علی، یاسر بلال وانی، مزمل، عادل احمد راتھر، مفتی عرفان احمد، شاہین، شعیب، بلال اور یاسر احمد ڈار سمیت دیگر افراد کو شامل کیا گیا ہے۔

این آئی اے کی جانب سے کی جانے والی تحقیقات کا دائرہ جموں و کشمیر، ہریانہ، اتر پردیش، مہاراشٹر، گجرات اور دہلی این سی آر تک پھیلا ہوا ہے۔ تفتیش کے دوران 588 گواہوں کے بیانات قلمبند کیے گئے جبکہ 395 سے زائد دستاویزات اور 200 سے زیادہ ضبط شدہ اشیا و شواہد کو بھی چارج شیٹ کا حصہ بنایا گیا ہے۔

خصوصی این آئی اے عدالت نے چارج شیٹ کا نوٹس لیتے ہوئے کیس کی آئندہ سماعت 9 ستمبر کو مقرر کردی ہے۔ ایجنسی کے مطابق مقدمے کی مزید تفتیش بھی جاری ہے۔

رپورٹ کے مطابق 10 نومبر 2025 کو لال قلعہ کے باہر ایک گاڑی میں دھماکہ ہوا تھا، جس کے نتیجے میں 15 افراد ہلاک اور متعدد زخمی ہوئے تھے۔ این آئی اے کا دعویٰ ہے کہ مقدمے میں نامزد ملزمان کا تعلق انصار غزوات الہند سے تھا اور انہوں نے مبینہ طور پر ’’آپریشن ہیونلی ہند‘‘ کے نام سے ایک منصوبہ تیار کیا تھا۔

ایجنسی کے مطابق اس منصوبے کا مقصد مبینہ طور پر انتہا پسندانہ نظریات کو فروغ دینا اور بھارتی حکومت کے خلاف سازش کرنا تھا۔ چارج شیٹ میں شامل متعدد افراد کے بارے میں بتایا گیا ہے کہ وہ ڈاکٹرز اور دیگر پیشہ ور شعبوں سے وابستہ تھے۔

این آئی اے نے عدالت کو بتایا ہے کہ کیس کی تفتیش ابھی مکمل نہیں ہوئی اور مزید شواہد و معلومات سامنے آنے کی صورت میں کارروائی آگے بڑھائی جائے گی۔