لبنان: ‘الیکٹرونک ڈیوائسز’ میں مزید دھماکوں سے 14 افراد ہلاک، 450 سے زائد زخمی

بیروت (ڈیلی اردو/اے پی/وی او اے) لبنان کے دارالحکومت بیروت سمیت مختلف علاقوں میں مزید الیکٹرونک ڈیوائسز پھٹنے سے چودہ افراد ہلاک اور 450 سے زائد زخمی ہو گئے ہیں۔

خبر رساں ادارے ‘ایسوسی ایٹڈ پریس’ کے مطابق عسکری تنظیم حزب اللہ کا کہنا ہے کہ بیروت میں گروپ کے زیرِ استعمال واکی ٹاکیز پھٹنے سے دھماکے سنے گئے۔

‘ایسوسی ایٹڈ پریس’ کے مطابق یہ بھی اطلاعات ہیں کہ کچھ علاقوں میں سولر انرجی سسٹمز بھی پھٹے ہیں جب کہ حزب اللہ کے تین اہلکاروں اور ایک بچے کے جنازے کے مقام پر مزید دھماکے ہوئے ہیں۔

حزب اللہ کے المنار ٹی وی کا کہنا ہے کہ حالیہ دھماکے لبنان کے مختلف علاقوں میں واکی ٹاکی پھٹنے سے ہوئے ہیں۔

خبر رساں ادارے ‘اے ایف پی’ نے بھی ذرائع کے حوالے سے رپورٹ کیا ہے کہ بیروت کے نواحی علاقوں میں کئی واکی ٹاکی پھٹے ہیں۔

https://x.com/AFP/status/1836486510469878151?t=XLktHzoLcjFEVp-7ou8cbw&s=19

بدھ کو دھماکوں کی اطلاعات ایسے وقت میں سامنے آئی ہیں جب لبنان میں منگل کو مختلف مقامات پر کمیونی کیش ڈیوائس پیجر پھٹنے سے درجنوں افراد ہلاک اور سینکڑوں زخمی ہو گئے تھے۔

حزب اللہ نے پیجرز کے منگل کو ہونے والے ہلاکت خیز دھماکوں کا الزام اسرائیل پر عائد کیا ہے اور دھمکی دی ہے کہ اسرائیل کو ان دھماکوں کی سزا دی جائے گی۔