لبنان میں اسرائیلی فضائی حملہ: حزب اللہ کے چیف آف اسٹاف علی طباطبائی ساتھیوں سمیت ہلاک

واشنگٹن (ش ح ط) لبنان کے دارالحکومت بیروت میں اسرائیلی فضائی حملے میں حزب اللہ کے چیف آف جنرل اسٹاف ہیثم علی طباطبائی اپنے کم از کم دو ساتھیوں کے ساتھ ہلاک ہو گئے۔ 

یہ حملہ بیروت کے جنوبی مضافات کی مرکزی سڑک پر رات گئے کیا گیا۔ 

مقامی طبی ذرائع اور ہسپتالوں کے ابتدائی بیانات کے مطابق حملے میں مجموعی طور پر 3 سے 5 افراد ہلاک ہوئے جبکہ تقریباً دو درجن سے زائد زخمی ہوئے، جنہیں فوری طور پر قریبی اسپتالوں میں منتقل کیا گیا؛ بعض زخمیوں کی حالت تشویشناک بتائی جا رہی ہے اور امدادی تنظیمیں موقع پر سرگرم ہیں۔

رہائشیوں نے بتایا کہ دھماکے سے کچھ لمحے قبل وہ فضاء میں جنگی طیاروں کی آواز سن رہے تھے، جس کے بعد خوف کے باعث اکثر لوگ عمارتوں سے باہر نکل آئے۔ حملہ ایک رہائشی علاقہ کی مرکزی سڑک پر ہوا اور متعدد عمارتیں متاثر ہوئیں۔

اسرائیلی وزیرِ اعظم بنیامین نیتن یاہو کے دفتر کے مطابق اس آپریشن کا ہدف ایران نواز تنظیم حزب اللہ کا تجربہ کار فوجی عہدیدار علی طباطبائی تھا، جبکہ اسرائیلی فوج نے بھی ان کی ہلاکت کی باضابطہ تصدیق کر دی ہے۔ 

دوسری جانب حزب اللہ نے بھی طباطبائی کی ہلاکت کی تصدیق کر دی ہے۔

امریکی حکام کے مطابق اسرائیل نے اس حملے سے قبل واشنگٹن کو پیشگی اطلاع نہیں دی، تاہم واقعے کے فوراً بعد امریکی حکام کو آگاہ کیا گیا۔ ایک امریکی اہلکار کے مطابق امریکہ کو چند روز قبل معلوم تھا کہ اسرائیل لبنان میں ایک اہم رہنما کو ٹارگٹ کر سکتا ہے، لیکن اس مخصوص حملے کے بارے میں پیشگی اطلاع نہیں دی گئی۔

علی طباطبائی حزب اللہ کے ایک تجربہ کار عسکری کمانڈر تھے، جو 1980 کی دہائی سے تنظیم کے اندر سرگرم تھے۔ انہوں نے رضوان فورس کی قیادت کی، شام میں کارروائیوں کی نگرانی کی اور تنظیم کی عسکری و عملیاتی صلاحیتوں کو مضبوط بنایا۔ جنگ کے دوران اور آپریشن "نادرن ایروز" کے بعد وہ اسرائیل کے خلاف لڑائی اور مستقبل کی کارروائیوں کے لیے حزب اللہ کی تیاریوں کے ذمہ دار تھے۔ جنگ کے اختتام کے بعد انہیں حزب اللہ کا چیف آف جنرل اسٹاف مقرر کیا گیا۔

امریکہ نے 2016 میں علی طباطبائی پر پابندیاں عائد کی تھیں اور انہیں حزب اللہ کا اہم فوجی رہنما قرار دیتے ہوئے معلومات فراہم کرنے پر پانچ ملین ڈالر تک انعام کا اعلان کیا تھا۔ ماہرین کا کہنا ہے کہ بیروت میں کسی سینئر رہنما کو نشانہ بنانا علاقائی کشیدگی میں اضافہ کر سکتا ہے، اور حملے کے اثرات و حزب اللہ کے ممکنہ جوابی اقدامات آئندہ چند گھنٹوں اور دنوں میں موصول ہونے والی اطلاعات پر منحصر ہوں گے۔