لوئردیر میں ٹریفک اہلکار کے قتل میں ملوث 2 دہشت گرد ہلاک

لوئردیر (ڈیلی اردو) صوبہ خیبر پختونخوا کے ضلع لوئردیر میں ٹریفک اہلکار کے قتل میں ملوث دو دہشت گرد پولیس آپریشن میں ہلاک ہوگئے۔

پولیس کے مطابق جمعرات کے شب لوئردیر میں پولیس اور کاونٹر ٹیررازم ڈیپارٹمنٹ (سی ٹی ڈی) کو اطلاع ملی کہ ٹریفک پولیس کانسٹیبل بخت زمین کی ہلاکت میں ملوث دہشت گرد حفیظ اللہ اور برہان الدین ملاکنڈ ڈویژن حدود تھانہ تالاش بمقام خٹ کلے میں موجود ہیں۔

لوئر دیر : پولیس اور سی ٹی ڈی کا مصدقہ اطلاعات پر آپریشن، ٹریفک اہلکار کی شھادت میں ملوث دو دہشت گرد پولیس مقابلے میں ہلاک ہو گئے۔ pic.twitter.com/QcmmEr6v8G

— KP Police (@KP_Police1) April 13, 2023

اطلاع کے پیش نظر لوئر دیرمیں تیمرگرہ کے علاقے تالاش خٹکے میں پولیس اور سی ٹی ڈی پولیس نے مشترکہ آپریشن شروع کر دیا جس کے نتیجے میں دونوں دہشت گرد پولیس مقابلے میں ہلاک ہوگئے۔

پولیس کے مطابق دہشتگردوں نے پولیس پرفائرنگ کےعلاوہ ہینڈ گرینیڈ بھی پھینکے مگرخوش قسمتی سے ہینڈ گرنیڈ بلاسٹ نہ ہونے پر پولیس محفوظ رہی۔

پولیس نے دہشت گردوں کے قبضے سے دوعدد پستول اور ہینڈ گرینیڈ بھی برآمد کرنے کا دعویٰ کیا ہے۔