لکی مروت میں جے یو آئی رہنما سمیت دو افراد ہلاک، انڈس ہائی وے پر احتجاج

لکی مروت (ڈیلی اردو) پاکستان کے شورش زدہ صوبہ خیبرپختونخوا کے ضلع لکی مروت میں جمعیت علمائے اسلام (جے یو آئی) کے مقامی رہنما اور سابق ویلیج ناظم گل زرین سمیت دو افراد کی ہلاکت کے بعد علاقے میں کشیدگی پھیل گئی۔ واقعے کے خلاف جے یو آئی کارکنوں اور ہلاک افراد کے لواحقین نے پشاور-کراچی انڈس ہائی وے بلاک کرکے احتجاج شروع کر دیا اور واقعے کی شفاف تحقیقات کا مطالبہ کیا۔

پولیس کے مطابق لکی مروت کے علاقے خانزادہ خیل میں سڑک کے کنارے سے دو افراد کی لاشیں برآمد ہوئیں۔ ابتدائی اطلاعات کے مطابق دونوں افراد فائرنگ سے ہلاک ہوئے تھے۔

پولیس نے ہلاک ہونے والوں کی شناخت گل زرین ٹھیکیدار اور مطیع اللہ کے نام سے کی ہے۔ دونوں کا تعلق لکی مروت کے علاقے پہاڑ خیل پکہ سے بتایا جاتا ہے۔

پولیس کے مطابق گل زرین سابق ویلیج ناظم تھے اور جمعیت علمائے اسلام کی تحصیل سطح کی تنظیم میں بھی سرگرم تھے۔

واقعے کے بعد جے یو آئی کارکنوں، مقامی رہنماؤں اور لواحقین نے تاجہ زئی کے مقام پر لاشیں رکھ کر پشاور-کراچی انڈس ہائی وے ہر قسم کی آمدورفت کے لیے بند کر دی، جس کے باعث شاہراہ کے دونوں اطراف گاڑیوں کی لمبی قطاریں لگ گئیں اور مسافروں کو مشکلات کا سامنا کرنا پڑا۔

احتجاج میں جمعیت علمائے اسلام کے سربراہ مولانا فضل الرحمان کے صاحبزادے اسجد محمود نے بھی شرکت کی اور ہلاک افراد کے اہل خانہ سے اظہارِ تعزیت کیا۔

لواحقین نے الزام عائد کیا ہے کہ گل زرین اور مطیع اللہ کو پولیس امن کمیٹی نے حراست میں لیا تھا، جس کے بعد ان کی لاشیں برآمد ہوئیں۔ مظاہرین نے واقعے کی غیر جانبدارانہ تحقیقات اور ذمہ داروں کے خلاف کارروائی کا مطالبہ کیا ہے۔

احتجاجی شرکا کا کہنا ہے کہ جب تک انہیں انصاف کی یقین دہانی نہیں کرائی جاتی، ان کا احتجاج جاری رہے گا۔ انہوں نے اعلان کیا ہے کہ ہلاک افراد کی نمازِ جنازہ بھی پشاور-کراچی انڈس ہائی وے پر ادا کی جائے گی۔

تاہم پولیس اور ضلعی انتظامیہ کی جانب سے لواحقین کے الزامات پر تاحال کوئی باضابطہ مؤقف سامنے نہیں آیا۔