لکی مروت میں دہشت گردوں کے جیل، تھانہ اور چوکی پر حملے، ٹی ٹی پی نے ذمہ داری قبول کرلی

لکی مروت (ڈیلی اردو/ٹی این این) صوبہ خیبر پختونخوا کے ضلع لکی مروت میں دہشت گردوں نے پولیس چوکی، جیل اور تھانے پر حملے کیے جنہیں ناکام بنا دیا گیا ہے۔

تفصیلات کے مطابق دہشت گردوں نے یکے بعد دیگرے بھرپور حملوں سے خیبر پختونخوا پولیس کو نشانہ بنانے کی کوشش کی تاہم پولیس کے سپاہیوں اور افسران نے کارروائی کرتے ہوئے حملوں کو ناکام بنایا۔

پولیس کے مطابق دہشت گردوں نے لکی مروت میں رات 11 بج کر 30 منٹ کے قریب تین اطراف سے پولیس چوکی، جیل اور تھانہ لکی پر حملہ کیا جس کے دوران پولیس پر دستی بم پھینکے گئے اور اندھا دھند فائرنگ بھی ہوئی تاہم یہ حملے ناکام رہے۔

پولیس چوکی کے اہلکاروں نے دہشت گردوں کے خلاف جوابی فائرنگ کی۔ مسلح افراد نے تھانہ لکی مروت پر حملہ کیا تو پولیس کے بہادر جوانوں نے تن دہی سے مقابلہ کرتے ہوئے دہشت گردوں کو پلٹ کر فرار ہونے پر مجبور کردیا۔

لکی مروت پولیس کا کہنا ہے کہ دونوں جانب سے فائرنگ کے نتیجے میں کوئی جانی نقصان نہیں ہوا اور دہشت گردوں کے زخمی یا ہلاک ہونے کی بھی کوئی اطلاع نہیں۔

پولیس کے مطابق نامعلوم دہشتگردوں کو تھرمل کیمرہ کے ذریعے موجودگی کا پتہ چلا، جن کی فائرنگ کا پولیس نے بھاری ہتھیاروں سے بھرپور جواب دیا جس کے باعث دہشتگرد بھاگنے پر مجبورہوگئے۔ جب کہ حملے میں پولیس اہلکار محفوظ رہے۔

پولیس نے علاقے کو گھیرے میں لے لیا، اور کسی کو بھی جائے وقوع پر جانے کی اجازت نہیں، جب کہ علاقے میں سرچ آپریشن بھی شروع کیا جاچکا ہے۔

دوسری جانب کالعدم تنظیم تحریک طالبان پاکستان نے حملے کی ذمہ داری قبول کرلی۔

ترجمان ٹی ٹی پی محمد خراسانی نے دعوی کیا ہے کہ مجاہدین نے بیک وقت سی ٹی ڈی آفس، پولیس چوکی، سٹی پولیس اسٹیشن اور ڈسٹرکٹ جیل پر ہلکے اور بھاری ہتھیاروں سے حملہ کیا جس میں کافی جانی ومالی نقصان کا قوی امکان ہے۔

خیال رہے کہ حالیہ دنوں میں خیبر پختونخوا میں دہشت گردی کے واقعات میں اضافہ دیکھنے میں آیا ہے۔ دہشت گردوں کی تلاش کیلئے سرچ آپریشن جاری ہے۔ پولیس کا کہنا ہے کہ دہشت گردوں کی گرفتاری کیلئے کارروائی کی جارہی ہے۔