متحدہ عرب امارات پر ایران کے میزائل و ڈرون حملے جاری، وزارت دفاع

ابوظہبی (ڈیلی اردو) خلیجی ریاست متحدہ عرب امارات نے کہا ہے کہ اس کا فضائی دفاعی نظام ایران کی طرف سے فائر کیے جانے والے نئے میزائلوں اور ڈرونز سے ’سرگرمی سے نمٹنے‘ میں مصروف ہے۔

دبئی سے منگل پانچ مئی کی شام موصولہ رپورٹوں کے مطابق خلیج فارس کی اس عرب ریاست کی وزارت دفاع نے کہا کہ ایران جنگ میں اپریل کے شروع سے مؤثر فائر بندی کے دوران تہران نے گزشتہ روز سے متحدہ عرب امارات میں اہم اقتصادی اور صنعتی تنصیبات پر جو میزائل حملے پھر شروع کر رکھے ہیں، وہ آج منگل کو دوسرے دن بھی جاری رہے۔

ساتھ ہی اس وزارت کی طرف سے کہا گیا کہ متحدہ عرب امارات کا ایئر ڈیفنس سسٹم ان میزائلوں سے ’فعال طور پر نمٹنے‘ میں مصروف ہے۔ اس وزارت کی طرف سے یہ نہیں بتایا گیا کہ ایسے حملوں کے دوسرے روز منگل کو کوئی جانی نقصان بھی ہوا یا نہیں۔

کل پیر کی شام ایران کی طرف سے آبنائے ہرمز کے کنارے اس ملک کے ساحلی شہر فجیرہ میں تیل کی بڑی صنعتی تنصیبات پر کیے گئے حملوں میں تین بھارتی تارکین وطن کارکن زخمی ہو گئے تھے۔

ابوظہبی میں یو اے ای کی وزارت دفاع نے سوشل میڈیا پلیٹ فارم ایکس پر اپنے ایک بیان میں لکھا، ’’ہمارا ایئر ڈیفنس سسٹم ان میزائلوں اور ڈرونز کو فضا میں ہی تباہ کر دینے کے لیے فعال ہے، جو ایران کی طرف سے فائر کیے جا رہے ہیں۔‘‘

دریں اثنا خلیج کی علاقائی طاقت سعودی عرب نے بھی اپنے ایک تازہ بیان میں متحدہ عرب امارات پر ایران کی طرف سے کیے جانے والے نئے میزائل اور ڈرون حملون کی شدید مذمت کی ہے۔