مردان: ڈاکٹر اسفند یار خٹک کے قتل میں ملوث دو ملزمان گرفتار

مردان (ویب ڈیسک) کاٹلنگ پولیس نے ینگ ڈاکٹر اسفند یار خٹک قتل کیس کے دو مرکزی ملزمان بھائیوں کو گرفتار کر لیا جبکہ تیسرے شریک واردات ملزم کی گرفتاری کے لئے بھی چھاپے مارے جارہے ہیں گرفتار ملزمان نے اعترف جرم بھی کرلیا۔

ڈی پی او مردان سجاد خان نے اپنے دفتر میں پریس کانفرنس کرتے ہوئے کہا کہ مورخہ 27 اپریل کو علاقہ تھانہ کاٹلنگ کی حدود میں مسجد کی نکاسی آب پر تین ملزمان جن میں دو بھائی مشرف اورعلی زر عرف زرے پسران محمد شیر اور حضرت علی ولد مشرف ساکنان انزرگی کاٹلنگ نے ڈاکٹر اسفند یار خٹک اور اس کے والد ماہر تعلیم پرنسپل تاج نبی خٹک کے ساتھ مسجد سے پانی کی نکاسی پر تکرار کی اور بہ ارادہ قتل فائرنگ کی جس کے نتیجے میں ینگ ڈاکٹر اسفند یار اور اسکا والد شدید زخمی ہوگیا تھا جنھیں MMC مردان منتقل کردیا گیا جہاں پر ڈاکٹر اسفند یار خٹک زخموں کی تاب نہ لاسکے اور جان بحق ہوگیا۔ پرنسپل تاج نبی خٹک نے زخمی حالت میں ملزمان کے خلاف واقع کی رپورٹ درج کراتے ہوئے کہا تھا کہ مشرف اور علی زر نے ان پر فائرنگ کی۔

ڈی پی او مردان سجاد خان نے کہا کہ اس افسوس ناک واقعے کا سختی سے نوٹس لے کر واقع میں ملوث ملزمان کی فوری گرفتاری کیلئے ڈی ایس پی کاٹلنگ قاضی عصمت اللہ کی سربراہی میں ایس ایچ او کاٹلنگ اور تفتیشی افسر پر مشتمل ٹیم تشکیل دی جنہوں نے جدید سائنسی خطوط اور پیشہ ورانہ حکمت عملی کے ذریعے کامیاب کارروائی کرتے ہوئے واردات میں نامزد دو مرکزی ملزمان بھائی مشرف اور علی زر عرف زرے کو 72 گھنٹوں کے دوران گرفتار کر کے آلہ قتل پستول 30 بور بھی برآمد کر لیا گیا اور تفتیش کے دوران اعتراف جرم بھی کرلیا جبکہ تیسرے شریک واردات ملزم حضرت علی کی گرفتاری کیلئے پولیس کارروائیاں جاری ہیں۔

یاد رہے کہ واقعے میں جان بحق ہونے والے ینگ ڈاکٹر اسفندیار خٹک حال ہی میں مانسہرہ کے ہسپتال میں میڈیکل آفیسر تعینات ہوئے تھے جبکہ انکے والد مشہورماہر تعلیم اور حیاء سیری دیر میں گورنمنٹ ہائیر سیکنڈری سکول کے پرنسپل تھے جن کی حالت اب بھی تشویش ناک بتائی جاتی ہے۔